पिंपरी : पिंपरी-चिंचवड महापालिकेच्या कर आकारणी व कर संकलन विभागाने मालमत्ता कर थकबाकीदारांकडून कर वसुलीसाठी जप्तीची मोहीम हाती घेतली आहे. पहिल्या टप्प्यात पाच लाखांपेक्षा अधिक थकबाकी असलेल्या ६९९ थकबाकीदारांवर जप्तीची कारवाई सुरू केली आहे. या मालमत्ताधारकांकडे ९६ कोटी रुपयांची थकबाकी आहे.
पिंपरी-चिंचवड शहरात निवासी, व्यावसायिक, औद्याेगिक, बिगर निवासी, माेकळ्या जागा अशा सात लाख ३२ हजार नाेंदणीकृत मालमत्ता आहेत. चालू आर्थिक वर्षांत महापालिकेने एक हजार काेटींच्या पुढे कर वसुलीचे उद्दिष्ट ठेवले आहे. आतापर्यंत चार लाख ६० हजार मालमत्ताधारकांनी ५७० काेटी रुपयांचा मालमत्ता कर महापालिका तिजाेरीत जमा केला आहे.
चालू आर्थिक वर्षात जास्तीत-जास्त कर वसुली व्हावी, यासाठी कर संकलन विभागाची आढावा बैठक झाली. या बैठकीत थकबाकीदारांच्या वसुलीबाबत चर्चा करण्यात आली. पहिल्या टप्प्यात पाच लाखांवरील थकबाकीदारांवर जप्ती मोहीम राबविण्याचे नियाेजन करण्यात आले आहे. त्यानुसार २० सप्टेंबरपर्यंत मोठ्या थकबाकीदारांच्या मालमत्ता जप्त करण्यात येणार आहेत.
विभागीय कार्यालयांमध्ये पथके
शहरात पाच लाखांवरील ६९९ थकबाकीदार आहेत. या मालमत्ताधारकांकडे ९६ कोटी रुपयांची थकबाकी आहे. ही थकबाकी वसूल करण्यासाठी विभागीय कार्यालयनिहाय पथके तयार करण्यात आली आहेत.
सुरुवातीला थकबाकीदारांना थकीत रक्कम भरण्याबाबत समज देण्यात येणार आहे. त्यानंतरही मालमत्ता कर न भरल्यास प्रत्यक्ष मालमत्ता जप्तीची कारवाई केली जाणार असल्याचे सहायक आयुक्त अविनाश शिंदे यांनी सांगितले.
चिखलीत सर्वाधिक थकबाकीदार
कर संकलन विभागाचे १८ विभाग आहेत. यामध्ये चिखली विभागात सर्वाधिक १२८ थकबाकी असलेल्या मालमत्तांची संख्या आहे. त्यानंतर कस्पटे वस्ती ११७, वाकड ९१, थेरगाव ८२, मनपा भवन ५१, सांगवी ३०, पिंपरी वाघेरे २९, आकुर्डी २२, मोशी २०, भोसरी १८, चिंचवड ३५, किवळे ३४, फुगेवाडी दापोडी दहा, चऱ्होली आठ, दिघी बोपखेल आठ, निगडी प्राधिकरण सात, तळवडे पाच आणि पिंपरीनगर चार अशा पाच लाखांपुढे थकबाकी असलेल्या ६९९ मालमत्ता आहेत.
मोठे थकबाकीदार कर भरत नाहीत. त्यामुळे पाच लाख रुपयांवरील मालमत्ता कर थकबाकीदारांवर जप्तीची कारवाई केली जाणार आहे. विभागीय कार्यालयामार्फत कठोर कारवाई सुरू केली आहे.- प्रदीप जांभळे-पाटील, अतिरिक्त आयुक्त, पिंपरी-चिंचवड महापालिका
