पिंपरी महापालिकेचा प्रारूप प्रभाग रचनेचा आराखडा राज्य सरकारकडे; ३२ प्रभागांमध्ये १२८ नगरसेवक,आरक्षणांमध्ये बदल

या आराखड्यामध्ये महिलांसाठी ६४ आणि पुरुषांसाठी ६४ जागा असणार आहेत. प्रभाग रचना २०१७ प्रमाणेच तयार करण्यात आली असून वाढत्या लाेकसंख्येमुळे प्रभागांतील आरक्षणांमध्ये बदल होणार असल्याचे प्रशासनाकडून सांगण्यात आले.

महापालिकेची निवडणूक २०१७ प्रमाणेच चार सदस्यीय प्रभाग पद्धतीने होणार आहे. सन २०११ च्या १७ लाख २७ हजार ६९२ लोकसंख्येप्रमाणेच प्रभाग रचना तयार केली आहे. तळवडे-चिखली भागातून प्रभाग रचना सुरू करून सांगवी-दापाेडी अशा उतरत्या क्रमाने पूर्ण केली. या प्रभाग रचनेचा प्रारुप आराखडा मंगळवारी राज्य शासनाच्या नगरविकास विभागाला सादर करण्यात आला. एक प्रभाग ४९ हजार ते ५९ हजार मतदार संख्येचा असणार आहे. महापालिकेचे एकूण ३२ निवडणूक प्रभाग असणार आहेत. या प्रभागामधून १२८ नगरसेवकांना मतदार निवडून देतील. त्यातील ६४ जागांवर महिला नगरसेविका असतील. १२८ पैकी अनुसूचित जातीसाठी २० (महिलांसाठी दहा), अनुसूचित जमातीसाठी तीन (महिलांसाठी दोन), नागरिकांचा मागासवर्ग प्रवर्गासाठी ३५ (महिलांसाठी १८) जागा राखीव आहेत. तर, सर्वसाधारणसाठी ७० (महिलांसाठी २३) जागा असणार आहेत.

२२ ऑगस्टला आराखडा प्रसिद्ध

महापालिकेने सादर केलेल्या प्रारूप प्रभाग रचनेच्या आराखड्याची नगरविकास विभागाकडून तपासणी करण्यात येईल. त्यांनी निर्माण केलेल्या शंका, त्रुटीचे निरसन केले जाईल. त्यानंतर नगरविकास विभाग राज्य निवडणूक आयाेगाला प्रभाग रचनेचा आराखडा सादर करणार आहे. आयाेगाने मान्यता दिल्यानंतर २२ ऑगस्टला महापालिका आयुक्त प्रारूप प्रभाग रचनेचा आराखडा प्रसिद्ध करणार आहेत. या आराखड्यावर २२ ते २८ ऑगस्ट या कालावधीत हरकती व सूचना मागविण्यात येणार आहेत.

प्रारूप प्रभाग रचनेचा आराखडा नगरविकास विभागाला सादर केला आहे. राज्य निवडणूक आयाेगाकडून मान्यता मिळाल्यानंतर प्रारूप प्रभाग रचना प्रसिद्ध केली जाईल. एससीसाठी २०, एसटी तीन, ओबीसी ३५ तर खुल्या प्रवर्गासाठी ७० जागा असतील. प्रभागातील आरक्षणात बदल हाेईल.- अविनाश शिंदे, सहायक आयुक्त, निवडणूक विभाग, पिंपरी-चिंचवड महापालिका