पुणे : चाकण औद्योगिक क्षेत्रातील वाहतूक कोंडी सोडविण्याच्या दृष्टीने या भागातील अनधिकृत बांधकामांवर कारवाई करण्याचा निर्णय पुणे महानगर प्रदेश विकास प्राधिकरणाने (पीएमआरडीए) घेतला आहे. त्यानुसार पुढील आठवड्यापासून कारवाई करण्यात येणार असून पुन्हा पुन्हा अतिक्रमणे करणाऱ्यांवर गुन्हे दाखल करण्यात येणार आहेत.
चाकणसह परिसरात सातत्याने होणारी वाहतूक कोंडी दूर करण्याच्या अनुषंगाने पुणे महानगर प्रदेश विकास प्राधिकरणाच्या माध्यमातून विविध उपायोजना करण्यात येत आहे. त्या अनुषंगाने या भागातील अतिक्रमणांचे सर्वेक्षण करण्यात येत आहे. संबंधितांनी अनाधिकृत बांधकामे तसेच अतिक्रमणे तातडीने काढून घेण्याचे आवाहन पीएमआरडीएचे महानगर आयुक्त डॉ. योगेश म्हसे यांनी यापूर्वी केले आहे.
वाढत्या अतिक्रमाणांमुळे चाकण एमआयडीसीसह परिसरात वाहतूक कोंडी होत असल्याने वाहनचालक आणि नागरिकांना अनेक अडचणींचा सामना करावा लागत आहे. त्यामुळे वाहतूक कोंडी दूर करण्यासाठी पीएमआरडीएच्या अनधिकृत बांधकाम आणि निर्मूलन विभागाच्या माध्यमातून या भागातील प्रस्तावित रस्ता रुंदीनुसार जागेवर मार्किंग करण्यात येणार आहे. आगामी आठवड्याभरात संबंधित अनाधिकृत बांधकामे आणि अतिक्रमणावर निष्कासनाची कारवाई करण्यात येणार असल्याने संबंधितांनी आपली अतिक्रमणे स्वतःहून काढून घेत प्रशासनास सहकार्य करावे, असे आवाहन महानगर आयुक्त डॉ. योगेश म्हसे यांनी केले आहे.
चाकण परिसरातील वाहतूक कोंडी कमी करण्यासाठी समांतर रस्त्यांचे जाळे विकसित करण्याच्या अनुषंगाने भर देण्यात येत आहे. काही रस्ते अरुंद असल्याने ते रुंद करण्यासाठी नवीन रस्त्यांची आखणी करण्यात येत आहे. पुणे नाशिक रस्ता, तळेगाव चाकण शिक्रापूर रस्ता, नगरपालिका क्षेत्र आणि नवीन प्रस्तावित रस्त्यांच्या परिसरातील अस्तित्वातील बुजविण्यात आलेले नाले खुले करण्यात येणार आहेत, असे डॉ. म्हसे यांनी सांगितले.
पुढील आ‌ड्यापासून अतिक्रमणे, अनधिकृत बांधकामांवर कारवाई करण्यात येणार आहे. प्रशासनाने काढलेली अतिक्रमणे संबंधितांनी पुन्हा केली तर त्यांच्यावर गुन्हा नोंदविण्यात येणार आहे. – डॉ. योगेश म्हसे, महानगर आयुक्त, पीएमआरडीए
