पुण्यात हडपसरमध्ये गॅस सिलिंडरच्या स्फोटात एकाच कुटुंबातील चौघे जखमी

टेकचंदसिंह चौहान (वय ४२), बेबी टेकचंदसिंह चौहान (वय ३८), कशिश टेकचंदसिंह चौहान (वय १८), निखिल टेकचंदसिंह चौहान (वय १५) अशी जखमी झालेल्यांची नावे आहेत. पोलिसांनी दिलेल्या माहितीनुसार, चौहान कुटुंब मूळचे उत्तर प्रदेशमधील आहे. ते आठ दिवसांपूर्वी पुण्यात आले आहे. महमंदवाडी रस्त्यावरील वाडकर मळा भागात अजय परदेशी यांची खोली भाड्याने ते राहत होते. कामाच्या शोधात चौहान कुटुंबीय पुण्यात आले होते.

चौहान कुटुंबीय गाढ झाेपेत होते. बुधवारी पहाटे पाचच्या सुमारास सिलिंडरमधून गळती सुरू झाली आणि स्फोट झाला. स्फोटाच्या हादऱ्यात खिडकीच्या काचा फुटल्या, तसेच स्फोटानंतर लागलेल्या आगीत टेबल आणि कपडे जळाले. स्फोटात चौहान कुटुंबीय होरपळले. स्फोटाचा आवाज झाल्यानंतर शेजाऱ्यांनी धाव घेतली. अग्निशामक दल, तसेच काळेपडळ पोलिसांना या घटनेची माहिती कळविण्यात आली. अग्निशामक दलाच्या जवानांनी घटनास्थळी धाव घेऊन आगीवर नियंत्रण मिळवले. स्फोटात जखमी झालेल्या चौहान कुटुंबीयांना सुरुवातीला एका खासगी रुग्णालयात उपचारासाठी दाखल केले होते. प्राथमिक उपचार केल्यानंतर त्यांना ससून रुग्णालयात दाखल करण्यात आले.

कामाच्या शोधात पुण्यात

चौहान कुटुंबीय कामाच्या शोधात काही दिवसांपूर्वी पुण्यात आले होते. बुधवारी पहाटे गॅसचा वास येत असल्याने चौहान यांनी लायटर लावले. त्या वेळी सिलिंडरचा स्फोट झाला. पोलिसांनी घटनास्थळाची पाहणी केली. तेव्हा शेगडीचा एक बर्नर सुरू असल्याचे आढळून आले.

औंधमध्ये सदनिकेत आग; तरुण जखमी

औंध गावातील सदनिकेत आग लागून तरुण जखमी झाल्याची घटना बुधवारी दुपारी घडली. औंध गावातील गुरुद्वाराजवळ जुनवणे रेसिडन्सी आहे. या इमारतीतील सदनिकेत बुधवारी दुपारी बाराच्या सुमारास आग लागल्याची माहिती अग्निशामक दलाला मिळाली. त्यानंतर दलाच्या जवानांनी घटनास्थळी धाव घेतली. सदनिकेत दत्तात्रय किसन भंडलकर (वय ३८) हे पेटलेल्या अवस्थेत होते. जवानांनी तातडीने भंडलकर यांना खासगी रुग्णालयात दाखल केले. पाण्याचा मारा करून आग आटोक्यात आणली. सदनिकेतील स्वयंपाकघर, शयनगृहातील साहित्य जळाले होते. जवानांनी सदनिकेतून दोन सिलिंडर बाहेर काढले. सिलिंडरमधून गळती होत असल्याचे निदर्शनास आले. जवानांनी गळती रोखली, अशी माहिती अग्निशामक दलाच्या मुख्य नियंत्रण कक्षाकडून देण्यात आली.