पुणे : पादचारी ज्येष्ठाचा अपघातांत मृत्यू

पुणे : शहरात पुणे-सोलापूर रस्त्यावर रवीदर्शन चौकात भरधाव टेम्पाेच्या धडकेत पादचारी ज्येष्ठ महिलेचा मृत्यू झाल्याची घटना घडली. विमलाबाई मथुराप्रसाद अगरवाल (वय ८२, रा. लोणावळा) असे मृत्युमुखी पडलेल्या ज्येष्ठ महिलेचे नाव आहे.

टेम्पोचालक विनोद गायकवाड याला अटक करण्यात आली. मनोज अगरवाल यांनी फिर्याद दिली आहे. पोलिसांनी ही माहिती दिली.अगरवाल मूळचे लोणावळ्यातील आहेत. ते कामानिमित्त हडपसर भागात नातेवाईकांकडे आले होते. सोलापूर रस्त्यावरील रवीदर्शन चौकात गुरुवारी (२२ मे) विमलाबाई रस्ता ओलांडत होत्या. त्या वेळी भरधाव टेम्पोने रस्ता ओलांडणाऱ्या विमलाबाई यांना धडक दिली. गंभीर जखमी झालेल्या विमलाबाई यांचा मृत्यू झाला. टेम्पोचालकाला पकडून नागरिकांनी पोलिसांच्या ताब्यात दिले. सहायक पोलीस निरीक्षक हसीना शिकलगार तपास करत आहेत.