पुणे : डेक्कन परिसरातील सह्याद्री रुग्णालयात यकृत प्रत्यारोपण शस्त्रक्रियेनंतर पती व पत्नीचा मृत्यू झाला होता. या प्रकरणी रुग्णांच्या नातेवाइकांनी डेक्कन पोलिसांकडे तक्रार दिली आहे. त्यामुळे पोलिसांच्या विनंतीनुसार आता ससूनमधील समितीकडून रुग्णालयाची चौकशी केली जाणार आहे.
सह्याद्री रुग्णालयात यकृत प्रत्यारोपणानंतर बापू कोमकर (वय ४९) यांचा १५ ऑगस्टला मृत्यू झाला होता, तर दाता असलेल्या पत्नी कामिनी कोमकर (वय ४२) यांचा २२ ऑगस्टला मृत्यू झाला होता. रुग्णांच्या नातेवाइकांनी याप्रकरणी सह्याद्री रुग्णालयावर हलगर्जीपणाचा आरोप केला असून, डेक्कन पोलीस ठाण्यात तक्रार दिली आहे. पोलिसांनी या प्रकरणी अकस्मात मृत्यूची नोंद केली आहे. पोलिसांनी बापू कोमकर यांचा मुलगा, त्यांची बहीण आणि पत्नीची बहीण अशा नातेवाइकांचे जबाब नोंदवून घेतले आहेत. याचबरोबर पोलिसांनी ससून रुग्णालयाला पत्र पाठवून या प्रकरणाची चौकशी करण्यासाठी पत्र लिहिले आहे. वैद्यकीय हलगर्जीपणा तपासण्यासाठी ससूनकडून समिती स्थापन करून चौकशी केली जाणार आहे.
दरम्यान, याआधी सार्वजनिक आरोग्य विभागाने चौकशीसाठी उच्चस्तरीय समिती स्थापन करण्याचा निर्णय घेण्यात आला. उच्चस्तरीय समितीच्या अध्यक्षपदी इंटरनॅशनल लिव्हर ट्रान्सप्लांट सोसायटी चेन्नईचे अध्यक्ष व यकृत प्रत्यारोपण तज्ज्ञ डॉ. मोहम्मद रेला असून, सदस्य सचिवपदी आरोग्य सेवा उपसंचालक डॉ. भगवान पवार आहेत. या समितीची बैठक दूरदृश्य प्रणालीद्वारे शुक्रवारी (ता.२९) झाली. या बैठकीत रुग्णालयाने सादर केलेल्या दोन्ही रुग्णांच्या वैद्यकीय अहवालांवर चर्चा करण्यात आली. याचबरोबर चौकशीची रूपरेषा निश्चित केली. या रुग्णांवर झालेले उपचार, त्यांच्यावरील शस्त्रक्रिया याच्याशी निगडित सर्व अहवाल आरोग्य विभागाने सह्याद्री रुग्णालयाकडून घेतले आहेत.
उच्चस्तरीय समितीची चौकशी पूर्ण होईपर्यंत सह्याद्री रुग्णालयातील प्रत्यारोपण शस्त्रक्रियांना आरोग्य विभागाने स्थगिती दिली आहे. याप्रकरणी सार्वजनिक आरोग्य विभागासह महापालिकेच्या आरोग्य विभागाने रुग्णालयाला नोटीस बजावली होती. या दोन्ही नोटिशींना रुग्णालयाने उत्तर दिले आहे. रुग्णालयाने वैद्यकीय उपचारात हलगर्जीपणा झाल्याचा आरोप फेटाळला आहे. याचबरोबर चौकशीत पूर्ण सहकार्य करण्याची भूमिका घेतली आहे.
सह्याद्री रुग्णालयाचा चौकशीचा फेरा
- सार्वजनिक आरोग्य विभागाकडून कारणे दाखवा नोटीस
- महापालिकेच्या आरोग्य विभागाची नोटीस
- सह्याद्रीतील यकृत प्रत्यारोपण शस्त्रक्रियांना स्थगिती
- सार्वजनिक आरोग्य विभागाकडून चौकशीसाठी उच्चस्तरीय समिती
- डेक्कन पोलिसांकडून अकस्मात मृत्यूची नोंद
- ससूनमधील वैद्यकीय हलगर्जीपणा चौकशी समितीला पोलिसांचे पत्र
