बिबवेवाडी येथील ‘ईएसआयसी’ रुग्णालयाच्या विस्तारीकरणाच्या कामाचा केंद्रीय कामगार मंत्री भूपेंद्र यादव यांनी आज (रविवार) आढावा घेतला. ईएसआयसीतच्या साडेसोळा एकर जागेवर ५०० खाटांचे रुग्णालय उभारण्याचे काम सध्या सुरू आहे. या वर्षाअखेरपर्यंत आवश्यक परवनग्या आणि निविदा प्रक्रिया पूर्ण होण्याची शक्यता आहे. भारतीय जनता पक्षाच्या पर्वती विधानसभा मतदारसंघाच्या आमदार माधुरी मिसाळ यांच्या मागणीवरून यादव यांनी रुग्णालयाला भेट दिली. राज्याचे उच्च शिक्षण मंत्री चंद्रकांत पाटील, कामगार मंत्री डॉ. सुरेश खाडे, आमदार माधुरी मिसाळ यावेळी उपस्थित होते. रुग्णालयाला वर्षअखेरीपर्यंत आवश्यक परवानग्या मिळणार असून निविदा प्रक्रियाही पूर्ण करण्यात येणार आहे. पुढील वर्षी जानेवारी महिन्यापासून प्रत्यक्ष बांधकाम सुरू होणार असून, जून २०२५ पर्यंत टप्प्याटप्याने काम पूर्ण होणे अपेक्षित आहे. सात मजल्याच्या इमारतीत सुमारे साठ हजार चौरस फूट बांधकाम होणार - “सर्व वैद्यकीय सोयींनीयुक्त सात मजल्याच्या इमारतीत सुमारे साठ हजार चौरस फूट बांधकाम होणार आहे. तळमजल्यावर अतिदक्षता विभाग, पहिल्या मजल्यावर बाह्य रुग्ण कक्ष, दुसरऱ्या मजल्यावर बाह्य आणि आंतर रुग्ण सुपरस्पेशालिटी सुविधांसाठी स्वतंत्र कक्ष, तीन ते सातव्या मजल्यापर्यंत साधारण ते अतिदक्षता विभागाचे कक्ष असतील. रेडिओलॉजी, बायोकेमेस्ट्रि, मायक्रोबायोलॉजी अशा विविध प्रयोगशाळांचा समावेश असणार आहे.”, अशी माहिती केंद्रीय सार्वजनिक बांधकाम विभागाचे उदयकुमार चोगले आणि ईएसआयसीचे बिनय काकडे यांनी दिली. गेली दहा वर्षे सातत्याने पाठपुरावा करीत आहे - मिसाळ “पर्वती विधानसभा मतदारसंघात एकही शासकीय रुग्णालय नाही. त्यामुळे सर्वसामान्य रुग्णांची मोठी गैरसोय होते. बिबवेवाडी येथील ईएसआयसीच्या नऊ एकर जागेवर ससूनच्या धर्तीवर रुग्णालय व्हावे यासाठी गेली दहा वर्षे सातत्याने पाठपुरावा करीत आहे. पाचशे खाटांचे रुग्णालय नियोजित वेळेत पूर्ण होईल यासाठी प्रयत्न करण्यात येईल.”, असे मिसाळ यांनी सांगितले.
