पुण्यातील संभाजी उद्यानातील राम गणेश गडकरी यांचा पुतळा हटवल्याप्रकरणी अटक केलेल्या चार आरोपींना न्यायालयाने ६ जानेवारीपर्यंत पोलीस कोठडी सुनावली आहे.
पुण्याच्या मध्यवर्ती भागात असलेल्या जंगली महाराज रोडवर संभाजी उद्यान आहे. मुठा नदी किनारी वसलेल्या या उद्यानात नाटककार राम गणेश गडकरी यांचा पुतळा आहे. १९६२ मध्ये आचार्य अत्रे यांच्या हस्ते या पुतळ्याचे अनावरण करण्यात आले होते. उद्यानाच्या मुख्य प्रवेशद्वारासमोर हा पुतळा होता. राम गणेश गडकरी स्मारक समितीने पुणे महापालिकेला हा पुतळा भेट म्हणून देण्यात आला होता. मंगळवारी पहाटे अडीच ते तीनच्या सुमारास संभाजी ब्रिगेडच्या कार्यकर्त्यांनी राम गणेश गडकरी यांचा पुतळा हटवला. हा पुतळा मुठा नदीत फेकण्यात आला होता. मंगळवारी सकाळी उद्यान उघडल्यावर हा सर्व प्रकार समोर आला. पुतळा हटवण्याची ही घटना सीसीटीव्ही कॅमे-यात कैद झाली होती. सीसीटीव्ही कॅमे-याच्या आधारे पोलिसांनी तपास सुरु केला होता. याप्रकरणातील चार आरोपींना पोलिसांनी मंगळवारी संध्याकाळी अटक केली होती. राम गणेश गडकरी यांचा पुतळा हटवण्याच्या घटनेचा राज्यभरात निषेध होत आहे.
