केंद्रीय विद्यापीठांतील भरती प्रक्रिया ‘सीयू-चयन’ संकेतस्थळामार्फत

पुणे: देशभरातील केंद्रीय विद्यापीठातील विविध पदांच्या भरतीची प्रक्रिया आता स्वतंत्र संकेतस्थळाद्वारे राबवली जाणार आहे. ‘सीयू-चयन’ असे नाव असलेले संकेतस्थळ कार्यान्वित करण्यात आले असून, केंद्रीय विद्यापीठांनी या पुढील त्यांची भरती प्रक्रिया संकेतस्थळामार्फत राबवण्याचे निर्देश देण्यात आले आहेत.

विद्यापीठ अनुदान आयोगाने (यूजीसी) या संदर्भातील परिपत्रक प्रसिद्ध केले. सध्या केंद्रीय विद्यापीठांतील पदांच्या भरतीची प्रक्रिया विद्यापीठ स्तरावर राबवली जाते. मात्र विद्यापीठे आणि अर्जदार यांना पूरक वातावरण उपलब्ध करून देण्यासाठी स्वतंत्र संकेतस्थळाची निर्मिती करण्यात आली. यूजीसीने २ मेपासून ‘सीयू-चयन’ संकेतस्थळ कार्यान्वित केले आहे. या संकेतस्थळावर रिक्त जागांची माहिती उपलब्ध करून देणे, जाहिराती प्रसिद्ध करणे, पदांसाठीचे अर्ज मागवणे आदी प्रक्रिया करता येईल. तसेच या संकेतस्थळाद्वारे संपूर्ण भरती प्रक्रिया ऑनलाइन पद्धतीने राबवली जाईल. त्यामुळे केंद्रीय विद्यापीठांनी आता या संकेतस्थळाचा वापर सुरू करावा, असे यूजीसीकडून स्पष्ट करण्यात आले.