पुणे : भरधाव मोटारीने सहा वाहनांना धडक दिल्याची घटना सोमवारी रात्री हडपसरमधील हांडेवाडी परिसरात घडली. अपघातात तिघे जण जखमी झाले असून, त्यांच्यावर रुग्णालयात उपचार सुरू आहेत.
या प्रकरणी मोटारचालकाला ताब्यात घेण्यात आले आहे. त्याच्याविरुद्ध रात्री उशिरा काळेपडळ पोलीस ठाण्यात गुन्हा दाखल करण्यात आला. मोटार चालक पाटील याने मद्यप्राशन केल्याची शक्यता पोलिसांनी व्यक्त केली आहे.
पोलिसांनी दिलेल्या माहितीनुसार, मोटारचालक पाटील सोमवारी रात्री सव्वानऊच्या सुमारास भरधाव वेगात हडपसरमधील हांडेवाडी परिसरातून निघाला होता. श्रीराम चौकात मोटार चालक पाटील याचे नियंत्रण सुटले आणि एकापाठोपाठ सहा वाहनांना धडक दिली. अपघातात दुचाकी आणि मोटारीचे नुकसान झाले. अपघाताची माहिती मिळताच काळेपडळ पोलिसांनी घटनास्थळी धाव घेतली. मोटार चालक पाटील याला ताब्यात घेतले. अपघातात जखमी झालेल्या चौघांना तातडीने रुग्णालयात दाखल करण्यात आले. मोटार चालका विरुद्ध रात्री उशिरा गुन्हा दाखल करण्यात आला. अपघातानंतर काही काळ श्रीराम चौकातील वाहतूक विस्कळीत झाली होती. वाहतूक पोलिसांनी वाहतूक सुरळीत केली.
