पिंपरी चिंचवडमध्ये कचऱ्यातून ‘प्रकाश’, मोशीत दिवसाला होते एवढी वीजनिर्मिती

पिंपरी-चिंचवड शहरात निर्माण होणाऱ्या दैनंदिन सुमारे १ हजार १५० मेट्रिक टन कचऱ्यावर मोशी येथील घनकचरा व्यवस्थापन प्रकल्पामध्ये प्रक्रिया केली जाते. त्यातील ७०० मेट्रिक टन कचऱ्यापासून १४ मेगावॅट वीजनिर्मिती करणे प्रकल्पाचे उद्दिष्ट आहे. हा प्रकल्प डीबीओटी तत्वावर पब्लिक प्रायव्हेट पार्टनरशिपनुसार विकसित केला गेला असून त्यांच्यामार्फत २१ वर्षे कालावधीसाठी चालवला जाणार आहे. कार्बन उत्सर्जन निरीक्षण कार्यप्रणालीचा यामध्ये वापर करण्यात आला आहे. या प्रकल्पामुळे दरवर्षी सुमारे ७ लाख टन कार्बन उत्सर्जन रोखले जाणार आहे.

हेही वाचा – पुणे: मोटारीचा धक्का लागून दुचाकीवरील दोघे पडले… विचारपूस सुरू असताना दोघांनी मोटारच पळवून नेली

कचऱ्यापासून वीजनिर्मिती प्रकल्प चालविण्यासाठी सुमारे २ मेगावॅट वीज लागत आहे. उर्वरित वीज महापालिकेच्या जलशुद्धीकरण, मैलाशुद्धीकरण केंद्रांसाठी वापरण्यात येत आहे. कचऱ्यापासून वीजनिर्मिती प्रकल्पासाठी चिखली येथील मैलाशुद्धीकरण केंद्रामध्ये प्रक्रिया केलेल्या पाच एमएलडी पाण्याचा वापर करण्यात येत असल्याने पिण्याच्या पाण्याची बचतही होत आहे. वीजनिर्मिती प्रकल्पाच्या सहाय्याने १७ ऑक्टोबरपर्यंत एकूण २२.८८ लाख युनिट वीज निर्मिती केली गेली आहे. महाराष्ट्र राज्य वीज वितरण कंपनीने ६ ऑक्टोबर रोजी मान्यतेचे प्रमाणपत्रही या प्रकल्पाला दिले आहे.

हेही वाचा – पुणे: ललित पाटीलला पळून जाण्यासाठी मदत; विनय अऱ्हानासह तिघांना पोलीस कोठडी

या प्रकल्पाच्या आधारे केवळ कचऱ्याची शास्त्रोक्त पद्धतीने विल्हेवाट लावली जात नाही. तर यामुळे महापालिकेच्या वीज बिलामध्येही भरीव बचत होत आहे. – शेखर सिंह, आयुक्त