पुणे : शहरात वेगवेगळ्या अपघातात दोघांचा मृत्यू

पुणे शहरात वेगवेगळ्या अपघातात दोघांचा मृत्यू झाला. हडपसरमधील महंमदवाडी रस्ता तसेच सासवड रस्त्यावर अपघात झाले. हडपसर भागातील महंमदवाडी पोलीस चौकीसमोर पाणी वाहतूक करणाऱ्या टँकरच्या धडकेने एकाचा मृत्यू झाल्याची घटना घडली. पांडुरंग सुखदेव पेठे (वय ५५, रा. साठेनगर, तरवडे वस्ती, महंमदवाडी रस्ता, हडपसर) असे मृत्युमुखी पडलेल्याचे नाव आहे. या प्रकरणी टँकरचालक मारुती माधव बोयणे (वय ४१, रा. आनंदनगर, तरवडे वस्ती, महंमदवाडी रस्ता, हडपसर) याला अटक करण्यात आली. पांडुरंग पेठे यांचा मुलगा सूरज पेठे (वय २१) याने या संदर्भात वानवडी पोलीस ठाण्यात फिर्याद दिली आहे. पांडुरंग पेठे हातगाडीवर भंगार माल गोळा करण्याचे काम करतात. सकाळी पावणेनऊच्या सुमारात ते हातगाडीवरुन भंगार माल गोळा करण्यासाठी जात होते. महंमदवाडी पोलीस चौकीसमोर पाणी वाहतूक करणाऱ्या टँकरने पेठे यांना धडक दिली. अपघातात गंभीर जखमी झालेले पेठे यांचा उपचारांपूर्वीच मृत्यू झाला. सहायक पोलीस निरीक्षक दत्तप्रसाद शेंडगे तपास करत आहेत.