पुण्यातील कोंढवा पोलीस ठाण्यात 'सामाजिक बहिष्कार प्रतिबंधक' या नविन कायद्यांतर्गत पहिला गुन्हा दाखल झाला असतानाच आता पिंपरीतही या कायद्याखाली गुन्हा दाखल करण्यात आला आहे. वैदू जात पंचायतीने समाजातील सहा कुटुंबावर बहिष्कार टाकला होता. याप्रकरणी अंधश्रद्धा निर्मूलन समितीच्या कार्यकर्त्यांच्या मदतीने गुन्हा दाखल करण्यात आला आहे. वैदू समाजाचे रामभाऊ लोखंडे आणि त्यांच्या सहा भावांना समाजातुन बहिष्कृत करण्यात आले होते. २०१४ मध्ये समाजातील लोकांनी लोखंडे कुटुंबीयांवर बहिष्कार टाकला होता. ५० हजार रुपये रक्कम घेऊन लोखंडे यांना समाजात घेण्यात आले. मात्र १६ जुलैला पुन्हा वैदू समाजाची पंचायत बसली. रामभाऊ लोखंडे आणि त्यांच्या कुटुंबीयांनी याला विरोध केल्याने त्यांना बहिष्कृत करण्यात आले. शेवटी अंधश्रद्धा निर्मूलन समितीच्या कार्यकर्त्यांच्या मदतीने सांगवी पोलिसात याप्रकरणी गुन्हा दाखल करण्यात आला. देवकार्यासाठी समाजात यायचे असेल तर एक लाख रुपये द्यावे लागतील. तरच आम्ही तुम्हाला समाजात परत घेऊ अशी धमकी पंचायतीतील पंचांनी दिली होती, असे रामभाऊ लोखंडे यांनी सांगितले. तसेच मुलांचे लग्न देखील होऊ देणार नाही असे लोखंडे कुटुंबीयांना सांगण्यात आले. या प्रकरणामुळे लोखंडे परिवार अडचणीत आला होता. अशा प्रकारे कोणाला समाजातून बहिष्कृत केल्यास समोर येऊन माहिती द्यावी तसेच पोलिसात तक्रार दाखल करावी असे आवाहन अंनिसच्या कार्यकर्त्यांनी केले.