प्रेमप्रकरणातून तरुणावर तीक्ष्ण शस्त्राने वार करण्यात आल्याची घटना देहूरोड भागात घडली. टोळक्याने केलेल्या हल्ल्यात तरुण गंभीर जखमी झाला आहे. शुभम राजेंद्र तरस (वय २१, रा. विकासनगर, देहूरोड) असे जखमी झालेल्या तरुणाचे नाव आहे. या प्रकरणी अरुण हासतोडिया आणि दादया होळकर यांना अटक करण्यात आली आहे. त्यांच्या पाच साथीदारांविरुद्ध गुन्हा दाखल करण्यात आला आहे. पसार झालेल्या साथीदारांचा पोलिसांकडून शोध घेण्यात येत आहे. शुभमचा भाऊ मयूर याने यासंदर्भात देहूरोड पोलीस ठाण्यात फिर्याद दिली आहे. पोलिसांनी दिलेल्या माहितीनुसार, शुभमचे आरोपीच्या नातेवाईक असलेल्या तरुणीसोबत प्रेमसंबंध होते. त्यामुळे आरोपी त्याच्यावर चिडले होते. मंगळवारी (१५ नोव्हेंबर) रात्री विकासनगर भागात आरोपींनी त्याला गाठले. त्याच्यावर कोयत्याने वार केले तसेच त्याला लाकडी दांडक्याने बेदम मारहाण केली. गंभीर जखमी झालेल्या शुभमवर खासगी रुग्णालयात उपचार सुरू आहेत.
