Chakli Recipe: दिवाळीत खमंग आणि कुरकुरीत चकलीसाठी भाजणीचे योग्य प्रमाण; वाचा परफेक्ट रेसिपी

३ वाट्या साधे तांदूळ
दीड वाटी हरभऱ्याची डाळ
१ वाटी उडीद डाळ
अर्धी वाटी मूग डाळ
१ वाटी पोहे
पाऊण वाटी धणे
२ टेबल स्पून जिरे

चकलीची भाजणी कशी करायची?

सर्वात आधी वर दिलेले सर्व धान्य स्वच्छ धुवून सावलीत वाळवून घ्यावीत.

सर्वप्रथम तांदूळ भाजून घ्यावेत. खूप जास्त लाल होईपर्यंत भाजू नयेत. किंचित गुलाबी रंग आला की गॅस बंद करावा.

हरभऱ्याची डाळ भाजून घ्यावी. त्यानंतर उडीद डाळ भाजून घ्यावी. साधारण लालसर रंग आला की गॅस बंद करावा.

मग मूगडाळ भाजावी. त्यानंतर पोहे भाजून घ्यावेत. पोहे भाजणं अर्ध्यावर आले असतानाच त्यात धणे टाकावेत. थोडावेळ तेही एकत्रितपणे भाजून घ्यावेत.

भाजणी थंड झाल्यानंतर या सर्व मिश्रणात २ टेबलस्पून जिरे घालून भाजणी बारीक दळून आणावी. या भाजणीत ४० ते ५० मध्यम आकाराच्या चकल्या होतात.

कुरकुरीत चकलीची रेसिपी

सुरुवातीला २ वाट्या चकलीच्या भाजणीपासून चकली करुयात. एका पातेल्यात पाऊण वाटी गरम पाणी, अर्धा टेबलस्पून तिखट, मीठ, अर्धा टेबलस्पून ओवा, १ टेबलस्पून तीळ, पाव टीस्पून हिंग, २ टीस्पून तूप टाकावे.

या पाण्याला उकळी आली की २ वाट्या चकलीची भाजणी त्यात टाकावी. गॅस बंद करून पाण्यात हे पीठ चांगले मिक्स करून घ्यावे.

त्यानंतर हे १ तासभर झाकून ठेवावे. तासाभराने पीठ घेऊन साध्या पाण्यात तो मऊसर भिजवून घ्यावा. चकली करण्याचं यंत्र म्हणजेच सोऱ्याला आतून तेल लावून घ्यावं.

त्यात हे तयार केलेलं पीठ टाकावं. मध्यम आकाराच्या चकल्या बटरपेपरवर किंवा दुधाच्या कॅरीबॅगवर करून घ्याव्यात.

हेही वाचा >> चिवडा नरम होतो? या ३ टिप्स वापरा शेवटपर्यंत राहील कुरकुरीत; ही सोपी रेसिपीही करा नोट

त्यानंतर कढईत तेल घ्यावं. भरपूर तापल्यावर गॅस मध्यम करून त्यात चकली तळून घ्यावी. दोन वाटी मिश्रणात साधारण १५ ते १६ चकल्या आरामात होतात.