बुकबातमी : जनरल मनोज नरवणे लिखित पहिल्याआधीचं दुसरं पुस्तक

माजी लष्करप्रमुखांच्या या पुस्तकातली गोष्ट- आणि पात्रंही- कल्पित आहेत. ते घडतंच मुळी २०२६ सालात. ‘एनडीए’च्या पहिल्या महिला बॅचची (२०२२) स्नातक आणि आता पद मिळालेली लेफ्टनंट रेणुका खत्री आणि त्याच तळावरचा लेफ्टनंट रोहित वर्मा हे दोघे एकमेकांविषयीची किल्मिषं, परस्परांबद्दलचे संशय विसरून जोडीनं एका खुनाचा छडा लावू पाहतात, अशी ही कथा. त्या तपासात त्यांना काही धक्कादायक माहिती मिळत जाते. ही काय माहिती असते? लष्करापर्यंत कोणाची ‘पोहोच’ आहे, याबद्दल काही गंभीर बाबी त्यांना कळतात का? – या प्रश्नांच्या उत्तरं खुद्द पुस्तक वाचूनच मिळवलेली बरी. जनरल नरवणे यांची भाणेवरची पकड आणि त्यांचे लेखनगुण यांचं कौतुक जसं या पुस्तकासाठी होतंय, तसं खरं तर त्यांनी लिहिलेल्या ‘फोर स्टार्स ऑफ डेस्टिनी’ या आत्मचरित्रासाठी होऊ शकलं असतं- कारण हे आत्मचरित्रच त्यांनी लिहिलेलं पहिलं पुस्तक होतं. ‘द कॅन्टोन्मेंट कॉन्स्पिरसी’ हे दुसरं – पण प्रकाशित झालेलं मात्र पहिलंच पुस्तक. वास्तविक जन. नरवणे यांचं आत्मचरित्रच जानेवारी २०२४ मध्ये ते प्रकाशित होणार होतं… ‘प्रेस ट्रस्ट ऑफ इंडिया’ या वृत्तसंस्थेनं त्या आत्मचरित्राचा काही अंश प्रसारितही केला होता… पण त्यानंतर ते पुस्तक भारतीय लष्कराकडे ‘विचारार्थ’ गेलं… आणि पुढे काहीही झालं नाही. आजही, ‘अॅमेझॉन’सारख्या पुस्तकविक्री संकेतस्थळांवर या पहिल्या पुस्तकाची छबी दिसते, पण विकत घेऊ गेलं तर ‘उपलब्ध नाही’ अशी सूचना येते. पण पहिल्याआधीच प्रकाशित झालेल्या या दुसऱ्या पुस्तकाला मात्र वाचकांची दाद मिळत आहे!