चिंतनधारा: भांडवलदारांना मते विकू नका!

अवगत असलेले काम सोडून, राज्यतंत्र चालविण्याच्या मागे लागून अधिकाराच्या जागाच पटकावतो असे जर प्रत्येकाने म्हटले तर कसे चालेल! राज्यतंत्र चालविण्यासाठी जी बुद्धी, युक्ती, त्याग, सत्यता व नीती हवी आहे, ती आमच्या सर्व लोकांत आली पाहिजे; पण आजचा समाज एवढय़ा खालच्या पातळीवर आहे की, त्याला कोणता पुढारी समाजाच्या हिताचा आहे हेसुद्धा कळत नाही. त्यामुळे भांडवलदार लाचलुचपत देतात आणि काळाबाजार करणारा निवडणुकीत यशस्वी करतात. हाच माणूस पुढे अधिकाराच्या जागेवरून आमची पिळवणूक करतो व आम्ही आमच्याच लोकांकडून आमचा नाश करून घेतो. ही ब्रिटिशांची राजनीती अद्याप आमच्या देशातून गेली नाही. मागासलेल्यांना सुबुद्ध करणे हाच यावर उपाय! हा किळसवाणा प्रकार पूर्ण बंद करायचा असेल तर आमचा शेतकरी, कष्टकरी समाज राष्ट्रीय बुद्धीने चमकला पाहिजे! हा समाज आपली शेती वा आपला धंदा करण्यात जेवढा पटाईत, तेवढा तो आपल्या देशाची राजनीती जाणण्यात, आपला पुढारी ओळखण्यात व आपणही प्रसंगी राजकारणाचा यथोचित वाटा उचलण्यात पटाईत आहोत या भावनेने नैतिक पातळीवर सज्ज झाला पाहिजे! यासाठी त्यांच्या बुद्धीच्या विकासाशिवाय दुसरा मार्गच असू शकत नाही. शेतकऱ्यांनो व कष्टकऱ्यांनो, तुम्ही ज्ञानाची, कामधंद्याची तसेच समाजसेवेच्या बुद्धीची वाढ करून घ्या तुमच्या तेजस्वी व स्वावलंबी वृत्तीने या भारत देशाला आदर्श राष्ट्र बनवा, हीच माझी तुम्हाला हाक आहे. महाराज ग्रामगीतेत लिहितात.

अरे! उठा उठा श्रीमंतांनो!।
अधिकाऱ्यांनो! पंडितांनो!।
सुशिक्षितांनो! साधुजनांनो !।
हाक आली क्रांतीची॥
गांवागांवासि जागवा।
भेदभाव हा समूळ मिटवा।
उजळा ग्रामोन्नतीचा दिवा। तुकडय़ा म्हणे॥

राजेश बोबडे