उलटा चष्मा : ऐक सूनबाई..

* अभ्यासक्रमाचा कालावधी तीन महिन्यांचा असेल व त्यात प्रात्यक्षिकासाठी ८०, तर लेखी परीक्षेसाठी २० गुणांची प्रश्नपत्रिका असेल. याचे स्वरूप गृहविज्ञानासारखे नसेल हे लक्षात घ्यावे.

* या कालावधीत प्रत्येक विद्यार्थिनीला रोज रात्री शिक्षकांनी निर्देशित केलेल्या छोटया पडद्यावरील सासू-सुनेच्या मालिका बघाव्या लागतील व दुसऱ्या दिवशी सकाळी यावरची प्रश्नावली सोडवावी लागेल.

* चवदार स्वयंपाक कसा करावा तसेच सांडगे, पापड, लोणचे, शेवया, कुरमुरे कसे तयार करायचे याचे शिक्षण शास्त्रीय पद्धतीने घेतल्यावर प्रात्यक्षिक करून दाखवावे लागेल.

हेही वाचा >>> चिंतनधारा : मृत्यूचे दु:ख अज्ञानमूलक

* प्रतिवाद न करता सासूरवास कसा सहन करावा याच्या टिप्स रोज दिल्या जातील.

* भारतीय पेहरावात स्वस्थ (कंफर्टेबल) कसे राहायचे याचे शिक्षण दिले जाईल.

* सासू खाष्ट असली व नवरा दुष्ट असला तरी त्यांच्या कल्याणासाठी कोणती व्रत-वैकल्ये ‘मनोभावे’ करावी हे सविस्तरपणे सांगितले जाईल व प्रात्यक्षिक करून घेतले जाईल.

* कुटुंबातील रीतीरिवाजानुसार उपवास करावेच लागतील. त्या दिवशी स्वास्थ्य उत्तम कसे ठेवायचे हे अभ्यासकाळात सांगितले जाईल.

* नवऱ्यासोबत स्वतंत्र राहण्याचा विचार कसा त्यागायचा याचे धडे या काळात दिले जातील. वेगळी चूल मांडू असे नवऱ्याने म्हटले तर त्याला प्रतिवाद कसा करायचा हेही शिकवले जाईल.

* भारतीय कुटुंबव्यवस्थेचे वैभव टिकवण्यात स्त्रियांच्या अश्रुपाताचा वाटा मोठा आहे. रडण्यात कमीपणा न मानता ज्येष्ठांच्या रागावण्यावर ‘मुळुमुळु’ कसे रडायचे याचे कौशल्य शिकवले जाईल. प्रात्यक्षिकात ‘हुकमी’ रडणाऱ्या विद्यार्थिनीला दहा गुण अतिरिक्त दिले जातील.

* कुटुंबातील ज्येष्ठांनी एखादे न पटणारे काम सांगितले तर थेट नकार न देता योग्य कसे नाही हे नंतर सर्वांना पटवून देण्याची कला विद्यार्थिनीमध्ये विकसित करून दिली जाईल.

* राग हा आदर्श सुनेचा क्रमांक एकचा शत्रू आहे. त्यामुळे तो आला तरी आतल्या आत त्याला शमवायचे कसे याची शास्त्रीय पद्धत या कालावधीत शिकवली जाईल.

* घरची परिस्थिती बिघडली तर संस्काराला धक्का न लागू देता अर्थार्जन कसे करायचे या विषयावर मान्यवरांकडून मार्गदर्शन आयोजित केले जाईल.

* कुटुंबातील सर्वांच्या आधी उठून तुळशीला पाणी घातल्याने होणारे वैज्ञानिक फायदे सविस्तरपणे सांगितले जातील. * हा अभ्यासक्रम यशस्वीपणे पूर्ण करणाऱ्यांसाठी कँपसमध्ये ‘प्लेसमेंट’ची सोय उपलब्ध करून दिली जाईल. यामुळे ‘आदर्श सून’ होण्याचा तुमचा मार्ग सुकर होईल.