भारत-पाकिस्तानच्या माजी दिग्गज खेळाडूंचा ‘कॅब’कडून हृद्य सत्कार

२०१२मध्ये झालेल्या भारत-पाकिस्तान सामन्याच्या वेळीसुद्धा अशा प्रकारे दिग्गज खेळाडूंच्या सत्काराची योजना आखण्यात आली होती. ‘‘पाकिस्तानी क्रिकेटमधील दिग्गज मंडळी व्यासपीठावर आहेत, हा अतिशय चांगला योग आहे. हा सामना रंगतदार होईल, अशी आशा आहे. चला सर्वानी क्रिकेटचा आनंद लुटूया,’’ असे सचिनने या वेळी सांगितले. तर इम्रान म्हणाले, ‘‘ईडन गार्डन्सवरील शेवटच्या सामन्यातील निकालच अपेक्षित आहे.’’

अमिताभ यांनी आपल्या भाषणात आधी कोलकातावासीयांशी बंगाली भाषेत संवाद साधला. ‘‘जो संघ सर्वोत्तम खेळेल, तो जिंकेल,’’ असे त्यांनी पुढे सांगितले. तर मुख्यमंत्री ममता बॅनर्जी म्हणाल्या, ‘‘भारत-पाकिस्तान सामन्याप्रमाणेच विश्वचषकाच्या अंतिम सामन्याचेसुद्धा आम्ही यशस्वीपणे यजमानपद सांभाळू.’’