वाहतूक पोलिसाला मारहाण ; दुचाकीस्वार अटकेत

डोंबिवली पूर्वेतील मंजुनाथ शाळेजवळ वाहतूक पोलीस शंकर कडू आपल्या सहकाऱ्यांसह वाहतुकीचे नियोजन करीत होते. त्याचवेळी मशाल चौकातून पेंडसेनगरकडे देवरत नाडार (२४) हा दुचाकीवरून एक दिशा मार्ग असताना विरुद्ध दिशेने चालला होता. कडू यांनी त्यांना एकदिशा मार्गातून जाऊ नये अन्यथा कारवाई केली जाईल, असा इशारा दिला. त्यानंतरही नाडार वेगाने दुचाकी घेऊन पुढे गेला. तेवढय़ात वाहतूक पोलिसाने त्याला दंडात्मक कारवाई म्हणून ई-चलन फाडण्यासाठी त्याच्या दुचाकीच्या वाहनावरील क्रमांकाची मोबाइलमधून छबी काढली. त्याचा राग येऊन नाडारने दुचाकी रस्त्याच्या कडेला उभी केली.

वाहतूक पोलीस कडू यांना आपल्या वाहनाचा क्रमांक का टिपला, असे प्रश्न करून कडू यांच्या अंगावर धावून गेला. तसेच त्यांना मारहाणही करण्यात आली. याप्रकरणी कडू यांनी रामनगर पोलीस ठाण्यात गुन्हा दाखल करताच वरिष्ठ पोलीस निरीक्षक सचिन सांडभोर यांच्या आदेशावरून पोलिसांनी देवरत नाडार याला अटक केली.