ठाणे परिसरावर पाणीसंकट?

ठाणे, कल्याण, डोंबिवली, मीरा-भाईंदर या जिल्ह्य़ातील नागरी भागांचा महत्त्वाचा जलस्रोत म्हणजे बारवी धरण. बदलापूरजवळील या धरणातून परिसराला तब्बल ५०० दशलक्ष लिटर पाण्याचा पुरवठा केला जातो. मात्र यंदा कडाक्याच्या उन्हाळ्यामुळे या धरणातील पाणी आटले असून केवळ २५ टक्केच पाणीसाठा शिल्लक आहे. त्यामुळे पाऊस पडेपर्यंत ठाणे जिल्ह्य़ातील नागरी भागावर पाणीसंकट उभे राहणार आहे. गेल्या वर्षांपेक्षा यंदा उन्हाळ्यात धरणामध्ये कमी पाणी असल्याने पाणी जपून वापरण्याचे आवाहन करण्यात आले आहे.
गेल्या वर्षी मे महिन्याच्या पहिल्या आठवडय़ात बारवी धरणात ५७.८७ दशलक्ष घनमीटर (३३ टक्के) जलसाठा होता. यंदा केवळ ४५.४६ दशलक्ष घनमीटर (२५ टक्के) जलसाठा शिल्लक आहे. पाण्याच्या नियोजनासाठी दर वर्षी पाणीकपात केली जाते. यंदा मार्च-एप्रिल महिन्यापासूनच १५ टक्के पाणीकपात करण्यात आली आहे. या वर्षी उन्हाळा कडक असून पाण्याचे बाष्पीभवन मोठय़ा प्रमाणात होत असल्याने धरणातील पाणीसाठा झपाटय़ाने कमी होत आहे, अशी माहिती एमआयडीसी डोंबिवली विभागाचे कार्यकारी अभियंता शंकर जगताप यांनी दिली. गरज भासल्यास टाटा वीज प्रकल्पातून बारवी धरणात पाणी सोडता येऊ शकते, त्यामुळे सध्या तरी पाणीकपात वाढविण्याची गरज भासणार नाही. मे महिन्याच्या शेवटच्या आठवडय़ात पुन्हा आढावा घेऊन पाणीकपातीबाबत निर्णय घेतला जाईल, असेही त्यांनी सांगितले.