ठाणे शहरामधील वर्दळीचा भाग असणाऱ्या कॅडबरी कंपनी जवळच्या सिग्नलवर रात्री झालेल्या एका अपघातात ३५ वर्षीय इसमाचा मृत्यू झालाय. समोर आलेल्या माहितीनुसार मरण पावलेली व्यक्ती दुचाकीवरुन जात असताना तिने समोरच्या बसला धडक दिल्याने अपघात झाला. पूर्व द्रुतगती महामार्गावरील कॅडबरी सिग्नलजवळ शुक्रवारी रात्री दहाच्या सुमारास हा अपघात घडला. अपघातामध्ये मरण पावणाऱ्या व्यक्तीचं नाव संजय यादव असं आहे. संजय हे आपल्या दुचाकीवरुन जात असताना कॅडबरी सिग्नलजवळ त्यांच्या दुचाकीने ठाणे महानगरपालिकेच्या परिवहन सेवेच्या टीएमटी बसला मागून धडक दिली. ही धडक इतकी भीषण होती की यात संजय यांचा मृत्यू झाला. याप्रकरणाची राबोडी पोलीस स्थानकामध्ये नोंद करण्यात आली असून पोलीस पुढील तपास करत आहेत.