… म्हणून महाराष्ट्रातले उद्योग परराज्यात जात आहेत! अंबरनाथच्या उद्योजकांच्या आमा संघटनेचा गौप्यस्फोट; दलाल वाढले

ambernath industries warn of mass exodus

अंबरनाथच्या उद्योजकांच्या आमा संघटनेचा गौप्यस्फोट (छायाचित्र - लोकसत्ता टीम)

अंबरनाथ: राज्यातले उद्योग परराज्यात जात असल्याची ओरड अनेक विरोधी पक्षातल्या नेत्यांनी यापूर्वी केले होते. दलाली, दहशत माजवत उद्योजकांना कसा त्रास दिला जातो हे सातत्याने सांगितले जात होते. मात्र सारे काही अलबेल असल्याचे सांगत सरकार वेळ मारून नेत होती. मात्र याबाबत आता उद्योजक आणि त्यांच्या संघटना उघडपणे बोलू लागल्या आहेत. नुकत्याच एका पत्रकार परिषदेत अंबरनाथच्या आमा या संघटनेने याबाबत धक्कादायक खुलासे केले आहेत.

अंबरनाथ एमआयडीसी परिसरात दलालांचा प्रभाव इतका वाढला आहे की, एमआयडीसीचे भूखंड मूळ किमतीच्या चार ते पाच पट दराने विकले जात असल्याचा गंभीर आरोप येथील उद्योजकांच्या ‘आमा संघटने’ने केला आहे. या संदर्भात अंबरनाथ येथे आयोजित पत्रकार परिषदेत संघटनेचे अध्यक्ष उमेश तायडे यांनी अनेक धक्कादायक खुलासे केले.

उमेश तायडे यांनी सांगितले की, “गेल्या काही वर्षांत अंबरनाथ एमआयडीसीत रीतसर अर्ज करून भूखंड मिळवलेला उद्योजक शोधूनही सापडणार नाही. एमआयडीसी प्रशासन स्थानिकांकडून भूसंपादन पूर्ण न करता ती जमीन थेट उद्योजकांना विकते. मात्र, भूखंडाचा ताबा प्रत्यक्षात नसल्याने स्थानिक रहिवासी आणि उद्योजक यांच्यात वारंवार वाद निर्माण होतात. परिणामी, उद्योग सुरू करण्यासाठी किमान तीन ते चार वर्षांचा विलंब होतो.”

हेही वाचा

पनवेल ते डोंबिवली प्रवासासाठी पाच तास; सुट्टी आणि सणांच्या काळात प्रवासी मेटाकुटीला

स्थानिकांकडून सेवांमध्ये अतिरिक्त आकार

अंबरनाथ एमआयडीसीतील आणखी एक गंभीर समस्या म्हणजे स्थानिकांकडून घेतल्या जाणाऱ्या सेवा या आहेत. तायडे म्हणाले, “वाहतूक, मजूर पुरवठा, बांधकाम आणि इतर सुविधा या बाजारभावापेक्षा दुप्पट ते तिप्पट दराने द्याव्या लागतात. या वाढीव खर्चामुळे उद्योजकांचे उत्पादन खर्च वाढतात, स्पर्धात्मकता कमी होते आणि उद्योगांना आर्थिक नुकसान सहन करावा लागतो.”

म्हणून मोठ्या कंपन्यांचा पलायनाचा कल

या परिस्थितीमुळे अनेक मोठ्या कंपन्यांनी उत्पादनाचा मोठा भाग राज्याबाहेर हलवला आहे. यामुळे स्थानिक पातळीवर रोजगाराच्या संधी कमी झाल्या आहेत. तायडे यांनी याबाबत इशारा देताना सांगितले, “आम्ही स्थानिकांकडून सुविधा घेण्यास विरोध करत नाही, परंतु त्या बाजारभावानुसार असाव्यात. अन्यथा, अंबरनाथ एमआयडीसीतील सुमारे १,४०० कंपन्यांना महाराष्ट्राबाहेर स्थलांतर करण्याशिवाय पर्याय राहणार नाही.”

सरकार व एमआयडीसी प्रशासनाकडे मागणी

आमा संघटनेने सरकार आणि एमआयडीसी प्रशासनाकडे तातडीने या समस्यांकडे लक्ष देण्याची मागणी केली आहे. भूखंडांचे वितरण पारदर्शकपणे करण्याबरोबरच स्थानिक व उद्योजकांमध्ये संवादाची व्यवस्था निर्माण करण्यावर भर द्यावा, अशी सूचना तायडे यांनी केली.

उद्योजकांच्या मते, योग्य कारवाई झाली तर अंबरनाथ एमआयडीसी पुन्हा एकदा गुंतवणूकदारांसाठी आकर्षक ठिकाण बनू शकते, अन्यथा वाढता दलालशाहीचा विळखा आणि स्थानिकांचा अनुचित दबाव यामुळे उद्योगांचे पलायन रोखणे अशक्य होईल.