ठाण्यात रिक्षाचालकाकडून पुन्हा मुजोर वर्तन; तरुणीला कानशिलात लगावली

दोन दिवसांपूर्वीच ठाणे स्थानकानजीकच्या गोखले रोड परिसरात एका रिक्षाचालकाने तरूणीचा विनयभंग केल्याची घटना घडली होती. सिकंदर शेख उर्फ बबलू (२७) या रिक्षाचालकाचा एका तरूणीशी वाद झाला होता. या वादातून सिकंदर शेखने संबंधित तरूणीला शिवीगाळ आणि धक्काबुक्की केली. या घटनेनंतर संबंधित तरूणीने पोलिसांकडे याची तक्रार केली. त्यानंतर पोलिसांनी सिकंदर शेख याला ताब्यात घेतले. सिकंदर शेख हा राबोडी परिसरात राहणारा असून तो गुन्हेगारी पार्श्वभूमीचा आहे. त्याच्यावर यापूर्वी मारहाण आणि छेडछाडीचे गुन्हे दाखल झाले आहेत. या प्रकरणी ठाणे नगर पोलिसांनी रिक्षाचालकावर ३५४अ (१) छेडछाड, ३२३ मारहाणआणि ५०९ अश्लील कृत्य अन्वये गुन्हा दाखल केला होता.

ठाण्यात गेल्याच महिन्यात रिक्षाचालकाकडून तरूणीवर अतिप्रसंग करण्याचा प्रयत्न झाला होता. ठाण्यातील तीन हाथ नाका परिसरात ७ जून रोजी एक युवती शेअर रिक्षाने मानपाडा परिसरात जाण्यासाठी एका रिक्षामध्ये बसली. रिक्षा चालक संतोष लोखंडे याने तिला  नेत असताना त्याचा मित्र लहू घोगरे याला देखील रिक्षात बसवले. त्यानंतर माजिवडा जवळील गांधीनगर परिसरात त्यांनी या युवतीवर अतिप्रसंग करण्याचा प्रयत्न केला. सदरच्या मुलीने आरडा ओरड केल्यानंतर तिला जीवे ठार मारण्याची धमकी देवून तिला मारहाण केल्यानंतर त्यांनी पीडित तरुणीला रिक्षातून ढकलून दिले. पोलिसांनी या घटनेची गांभीर्याने दखल घेत दोन हजाराहून अधिक रिक्षा चालकांची चौकशी केली होती. त्यानंतर याप्रकरणी संतोष नामदेव लोखंडे ( वय ३८) आणि त्याचा मित्र लहू घोगरे (३९) या दोघांना अटक करण्यात आली होती.