गस्तीमुळे वृद्धाचे मारेकरी सापडले

महिनाभर ही गस्त कायम होती. ३० जूनची रात्र अंधारून आली तरी मारेकरी चोरटय़ांचा काही पत्ता लागला नव्हता. मात्र या ३० जूनच्या रात्री खूप उशिरा बदलापूर पश्चिमेकडील बेलवली येथे पोलिसांची जीप दिसताच काही तरुण रेल्वे रुळांकडे पळू लागले. पोलिसांनाही शंका आली. त्यांनीही पाठलाग केला. मोठय़ा शिताफीने पोलिसांना त्या पळणाऱ्यांपैकी पाच जणांना पकडण्यात यश आले. त्यांच्याकडे असलेल्या बॅगेत पाना, स्क्रू-ड्रायव्हर, कटर आदी सामान सापडले. त्यामुळे पोलिसांची शंकाही खरी ठरली होती. कारण ते चोरच होते. २५ वर्षीय माणिक पवार, २४ वर्षीय नीलेश गणवे, १४ वर्षीय महेश काकडे, १३ वर्षीय विकी डॅनियल, १० वर्षीय राकेश नाडर हे सर्व कळव्यातील झोपडपट्टय़ांमध्ये राहणारे होते. यातील अठरा वर्षांच्या आतील तिघांना कायद्याने अज्ञान म्हणून भिवंडी येथील बालसुधारगृहात नेण्यात आले व अन्य दोघांच्या चौकशीला पोलिसांनी सुरुवात केली.
चौकशीदरम्यान त्यांनी रेल्वे हद्दीलगत असलेल्या दत्त चौक, बेलवली अशा पश्चिमेकडील भागात चोरी केल्याचे सांगितले. त्यामुळे यांना संबंधित घरफोडीचे गुन्हे केल्याबद्दल अटक करण्यात आली. या वेळी अटक आरोपी गोणवे याने एक धक्कादायक खुलासा केला. त्याने सांगितले की, आम्ही वापरलेले चोरीचे सामान हे कळव्यातील उत्तम गायकवाड याचे असून तो व त्याचा मित्र संतोष नाईक आमच्याबरोबर रात्री जेव्हा आम्हाला पकडले तेव्हा सोबत होते, पण ते पळून गेले आणि याच उत्तम गायकवाड याने १ जूनला रात्री बदलापूर स्थानकाजवळील दिव्या ज्वेलर्स लुटून एकाची हत्या केली होती. पोलिसांना या चोरांकडून अपेक्षित माहिती मिळाली होती. तपास योग्य दिशेने सुरू आहे याची खात्री झाल्याने पोलिसांनी पुढची पावले उचलली. कारण उत्तम गायकवाड यातील मुख्य आरोपी होता. त्याच्या शोधासाठी तात्काळ परिमंडळ चारचे पोलीस उपायुक्त वसंत जाधव यांच्या मार्गदर्शनाखाली बदलापूर पश्चिमचे वरिष्ठ पोलीस निरीक्षक अशोक वांढेकर यांच्या नेतृत्वाखाली तपासाधिकारी साहाय्यक पोलीस निरीक्षक मधुकर पोळेकर यांच्यासह पोलीस हवालदार जे. एम. सावंत, पोलीस हवालदार डी. व्ही. शिरसाट, पोलीस नाईक आर. डी. लोणे व अन्य पोलीस कर्मचाऱ्यांचे पथक नेमण्यात आले. या पथकाने त्याचा कळव्यातील तो राहत असलेल्या आंतकोणेश्वर झोपडपट्टीत शोध घेतला. मात्र तेव्हा तो घरी नव्हता. त्या वेळी त्याचे मूळ गाव जालना जिल्ह्य़ातील परतूर हे असल्याने तेथे शोध घेण्यासाठी पोलिसांचे पथक रवाना झाले. मात्र तो तिथेही पोलिसांना सापडला नाही. एक दिवस कळवा पोलीस ठाण्याच्या पोलिसांनी उत्तम गायकवाडला पकडल्याची माहिती बदलापूर पश्चिम पोलिसांपर्यंत येऊन पोहोचली. बदलापूर पोलिसांनी त्याला ताब्यात घेतले. या वेळी त्याची चौकशी केली असता त्याने या गुन्ह्य़ाची कबुली दिली.

१ जूनच्या रात्री अडीचच्या वेळेत आरोपी उत्तम गायकवाड व त्याच्या अन्य तीन साथीदारांनी बदलापूर रेल्वे स्थानकानजीकचे दिव्या ज्वेलर्स लुटण्यास पूर्वनियोजित कटाप्रमाणे सुरुवात केली. या वेळी आत प्रवेश करताना व ज्वेलर्सचा दरवाजा तोडत असताना आवाज झाला व वृद्ध नारायण व्यापारी जागे झाले. व्यापारी यांनी प्रतिकार करताच उत्तम याने त्यांच्या गळ्यावर लोखंडी सुऱ्याने वार केला व त्यात ते रक्तस्राव होऊन गतप्राण झाले. नंतर चोरी करून चोरटे मालासह फरार झाले. सीसीटीव्हीमध्ये दिसणारा तरुण आपला भाचा मनोज पवार असल्याचे त्याने सांगितले. हे मामा-भाचे सराईत गुन्हेगार असून यापूर्वी पोलिसांवर हल्ला, पोलीस ठाण्याची जाळपोळ, घरफोडय़ा, खून, खुनाचा प्रयत्न असे पंधरापेक्षा जास्त गुन्हे केल्याचे समजले आहे.

तपासचक्र
संकेत सबनीस