अपुऱ्या साठय़ामुळे पुन्हा गोंधळ

केंद्र आणि राज्य शासनाच्या आदेशानुसार १८ ते ४४ वयोगटातील नागरिकांसाठी ५० टक्के ऑनलाइन पद्धतीने तर ५० टक्के वॉक इन पद्धतीने लसीकरण मोहीम राबविण्यात येत आहे. जिल्ह्य़ातील विविध केंद्रांवर १८ ते ४४ वयोगटातील नागरिकांनी लस घेण्यासाठी पहाटे पाच वाजल्यापासून रांगा लावल्याचे पाहायला मिळाले. ज्यांनी ऑनलाइन नोंदणी केली होती, अशा नागरिकांना लस मिळण्यास कोणताही अडथळा आला नाही. मात्र ज्या नागरिकांना ऑनलाइन नोंदणीनंतरही स्लॉट उपलब्ध झाला नाही, असे नागरिक वॉक इन पद्धतीने लस घेण्यासाठी केंद्रावर आले होते. त्यामुळे केंद्रांवर ‘वॉक इन’ येणाऱ्या नागरिकांची संख्याही मोठी असल्याने अनेकांना बुधवारी लशीविनाच परतावे लागले. ठाणे महापालिका क्षेत्रात बुधवारी ४५ केंद्रांवर लसीकरण करण्यात आले. यामध्ये ४४ केंद्रांवर १८ वर्षे वयोगटापुढील नागरिकांना लस देण्यात आली. उर्वरित केंद्रावर ४५ वर्षांपुढील नागरिकांना दुसरी मात्रा देण्यात येत होती.

जिल्हा शासकीय रुग्णालयातील लसीकरण केंद्र अपुऱ्या साठय़ामुळे बंद ठेवण्यात आले होते. कल्याण-डोंबिवली महापालिका क्षेत्रात मंगळवारपासूनच या वयोगटातील लसीकरण मोहिमेला सुरुवात करण्यात आली आहे. या शहरात बुधवारी लशींचा पुरेसा साठा उपलब्ध नसल्यामुळे केवळ दोनच केंद्रांवर लसीकरण करण्यात आले. प्रत्येक केंद्रावर २०० ते २५० नागरिकांना लस देण्यात आली. शहरात दोनच केंद्रे सुरू असल्यामुळे वॉक इन येणाऱ्या नागरिकांनी या केंद्रांवर गर्दी केलेली पाहायला मिळाली, तर भिवंडी शहरात पाच केंद्रांवर १८ वर्षांपुढील सर्व नागरिकांचे लसीकरण सुरू होते. उल्हासनगर शहरात सहा, अंबरनाथ दोन आणि बदलापूर तीन केंद्रावर लसीकरण सुरू होते. या केंद्रांवर ऑनलाइन नोंदणीपेक्षा वॉक इन येणाऱ्यांची संख्या जास्त असल्याचे चित्र होते.

लोकमान्यनगरमध्ये लशींच्या कूपनची लपवाछपवी

लोकमान्यनगर परिसरातील फिव्हर क्लिनिक या लसीकरण केंद्रावर गेले तीन दिवसापासून नागरिकांना कूपन मिळत नसल्याचा प्रकार समोर आला आहे. स्थानिक राज्यकीय नेत्यांकडून या कूपनची लपवाछपवी होत असल्याचे सूत्रांकडून सांगण्यात आले. या केंद्रावर बुधवारी १३५ वॉक इन येणाऱ्या नागरिकांसाठी लस साठा उपलब्ध होता. त्यासाठी नागरिकांनी पहाटे पाच वाजल्यापासून रांगा लावल्या होत्या. प्रत्यक्षात ८० ते ९० नागरिकांनाच लसीकरणाचे कूपन देण्यात आले. त्यामुळे इतर नागरिकांनी केंद्रचालकास विचारणा केली असता कूपन संपले असे सांगण्यात आले. त्यामुळे हे कूपन नेमके जातात कुठे, असा प्रश्न स्थानिक रहिवाशांकडून विचारण्यात येत आहे.

चंदनवाडीत शिवसेना शाखेत लसीकरण

केंद्र आणि राज्य शासनाकडून लसीकरण मोहिमेत कोणत्याही प्रकारची राजकीय बॅनरबाजी करायची नाही, असे आदेश असतानाही ठाण्यातील चंदनवाडी परिसरात असलेल्या शिवसेना शाखेत एका नेत्याकडून मोफत लसीकरण मोहिमेचे आयोजन करण्यात आले होते. शाखेबाहेर नागरिकांनी मोठय़ा संख्येने गर्दी केल्याने अंतरनियमाचा फज्जा उडाला होता, तसेच अनेक नागरिकांच्या तोंडावर मुखपट्टी नसल्याचेही दिसून आले.