बदलापूर पूर्वेतील औद्योगिक वसाहतीत असलेल्या एका रासायनिक कंपनीला लागलेल्या आगीत तीन कामगार होरपळले. गगनगिरी फार्मा केम असे या कंपनीचे नाव असून रविवारी दुपारच्या सुमारास ही आग लागली.कंपनीत आयपीए प्रकारातील रसायने तयार केली जातात. दुपारी बारा वाजण्याच्या सुमारास या कंपनीत आग लागली. तिने रौद्र रूप धारण केले. याची माहिती मिळताच कुळगाव बदलापूर नगरपालिकेच्या अग्निशमन दलाने घटनास्थळी धाव घेतली. आगीचे भीषण स्वरूप लक्षात घेऊन आनंद नगर एमआयडीसी, अंबरनाथ नगरपालिका, उल्हासनगर महानगरपालिका आदींच्या अग्निशमन दलांनाही पाचारण करण्यात आले होते. पाच अग्निशमन वाहने, दहा पाण्याच्या टँकरच्या साहाय्याने आग विझवण्यात आली. अग्निशमन दलाच्या जवानांनी सकाळी ११.२० ते संध्याकाळी ४.२० पर्यंत सलग चार तास अथक प्रयत्न करून आग पूर्णपणे विझवली. मात्र तीन कामगार जखमी झाले. तर या घटनेनंतर पहिल्या माळय़ावरून उडय़ा मारून बाहेर पडल्याने दोन कामगारांना दुखापत झाली. अनर्थ टळला..गगनगिरी फार्मा केम प्रा.लि. कंपनीत ‘आयपीए सॉलव्हंट’ या रसायनाची साठवण टाकी होती. त्याला क्लोरिन वायू जोडलेला असतो. या टाकीपर्यंत आग पोहोचली असती किंवा वायू गळती झाली असती तर मोठी दुर्घटना घडली असती. तिथपर्यंत आग पोहोचू नये यासाठी शैलेश जगताप व त्यांच्या सहकाऱ्यांनी सर्वतोपरी प्रयत्न केले आणि त्यात त्यांना यशही आले.
