डोंबिवली – डोंबिवली पूर्वेतील गोग्रासवाडी परिसरात शीतला माता मंदिराजवळील चंद्रकला म्हात्रे ही अति धोकादायक घोषित केलेली इमारत गुरुवारी अचानक कोसळली. सुदैवाने या दुर्घटनेत कोणतीही जीवित किंवा वित्तहानी झाली नाही, अशी माहिती कल्याण डोंबिवली महापालिकेच्या फ प्रभागाच्या सहाय्यक आयुक्त हेमा मुंबरकर यांनी दिली.
ही इमारत डोंबिवली पूर्वमधील पाथार्ली गाव हद्दीत येते. महापालिकेच्या फ प्रभाग क्षेत्रातील ही इमारत यापूर्वीच अति धोकादायक म्हणून घोषित करण्यात आली होती. गुरुवारी सकाळी ही इमारत कोसळली असताना परिसरात मोठा आवाज होऊन घबराट निर्माण झाली होती. मात्र, इमारत रिकामी असल्याने कोणतीही जिवीतहानी झाली नाही.
घटनेची माहिती मिळताच महापालिकेच्या सहायक आयुक्त हेमा मुंबरकर, अग्निशमन विभागाचे अधिकारी अग्निशमन प्रमुख नामदेव चौधरी यांच्या मार्गदर्शनाखाली घटनास्थळी दाखल झाले. आपत्कालीन व्यवस्थापन पथक तसेच फेरीवाला आणि अनधिकृत बांधकाम विभागाचे कर्मचारी घटनास्थळी दाखल झाले. तत्काळ बचाव व साफसफाईची कामे सुरू करण्यात आली. जेसीबी व डंपरच्या साहाय्याने मलबा हटवण्याचे काम युद्धपातळीवर सुरू केले.
महापालिकेच्या आपत्कालीन व्यवस्थापन विभागाने परिसरातील नागरिकांना सावधगिरी बाळगण्याचे आवाहन केले असून, धोकादायक इमारतींबाबत प्रशासन सतर्क असल्याचे सांगण्यात आले आहे. यापुढे अशा इमारतींची यादी अद्ययावत करून त्वरित कारवाई करण्यात येईल, असे सहाय्यक आयुक्त मुंबरकर यांनी सांगितले., पालिका क्षेत्रात सुमारे साडेचारशे धोकादायक इमारती आहेत. शहरातील जुन्या व जीर्ण इमारतींबाबत रहिवाशांनीही सतर्क राहून महापालिकेशी सहकार्य करावे, असे आवाहन प्रशासनाकडून करण्यात आले आहे.
