मुंब्र्यात लकी कंपाऊंडमधील इमारतीचा सज्जा कोसळला, एक महिला ठार, एक जखमी

मुंब्र्यातील दौलत नगर येथील लकी कंपाऊंडमधील डी-विंग हि इमारत तळ अधिक ३ मजली आणि एक टेरेस रूम आहे. हि इमारत अंदाजे २५ वर्षे जुनी असून, इमारतीच्या चौथ्या मजल्यावरील रूम नंबर ४०४ हि सदनिका रेहान फर्जानी यांच्या मालकीची आहे. या घराच्या बाहेरील सज्जाचा काही भाग कोसळला. यावेळी इमारतीच्या बाजूने जात असलेल्या दोन महिलांवर हा भाग कोसळला. त्यात त्या गंभीर जखमी झाल्या होत्या.

जखमी व मृत महिलेची नावे

इलमा जेहरा जमाली (२६ वर्षे) या गंभीर जखमी असून त्यांच्यावर मुंब्रा येथील काळसेकर हॉस्पिटल येथे उपचार सुरू आहेत. तर, नाहिद जैनउद्दीन जमाली (६२ वर्षे) यांचा गंभीर दुखापतीमुळे मुंब्रा येथील बिलाल हॉस्पिटल येथे उपचारादरम्यान मृत्यू झाला आहे. या दोन्ही महिला सना टॉवर, मदिना मशीद जवळ, कौसा कब्रस्तान परिसरात राहत होत्या.

इमारत केली रिकामी

इमारतीच्या सज्जाचा काही भाग कोसळल्याची माहिती मिळताच मुंब्रा अग्निशमन दल, आपत्ती व्यवस्थापन कक्ष, तसेच मुंब्रा प्रभाग समितीचे अधिकारी घटनास्थळी दाखल झाले. धोकादायक ठरलेला सज्जा आणि रूम नंबर ४०४ मधील विंडो ग्रील अग्निशमन दल आणि आपत्ती व्यवस्थापन कर्मचाऱ्यांनी तत्काळ हटवला. सुरक्षेच्या दृष्टिकोनातून संपूर्ण इमारत रिकामी करून सील करण्यात आली आहे, तसेच रहिवाशांनी तात्पुरती राहण्याची व्यवस्था स्वतःच्या नातेवाईकांकडे केली आहे. या घटनेच्या पुढील तपासासाठी मुंब्रा प्रभाग समिती व अतिक्रमण विभाग कार्यरत असून, भविष्यातील अशा दुर्घटना टाळण्यासाठी आवश्यक ती कार्यवाही करण्यात येणार असल्याचे प्रशासनाकडून सांगण्यात आले आहे.

किसननगरमध्ये इमारतीचा स्लॅब कोसळला होता

काही दिवसांपूर्वी ठाणे येथील किसन नगर क्र. २ मधील मस्जिद गल्लीमध्ये असलेल्या तिवारी सदन या इमारतीच्या दुसऱ्या मजल्यावरील एका खोलीचा स्लॅब कोसळला होता. या घटनेनंतर पालिकेने खबरदारीचा उपाय म्हणून संपूर्ण इमारत रिकामी केली असून यातील १७ रहिवाशांना ठाणे महानगरपालिका शाळेत तात्पुरत्या स्वरूपात स्थलांतरित करण्यात आले होते. या घटनेत कोणालाही दुखापत झाले नव्हते.