कळवा रेल्वे उड्डाणपुलाचे काम कासवगतीने

दोन वर्षांपूर्वी सुरू झालेले काम अद्याप प्राथमिक अवस्थेत
कळवा खारेगाव नाक्यावरील रेल्वे फाटकातून रुळ ओलांडताना होणारे अपघात टाळण्यासाठी रेल्वेकडून उभारण्यात येणाऱ्या उड्डाणपुलाचे काम गेल्या दोन वर्षांपासून ठप्प आहे. रेल्वे फाटक हटवून उड्डाणपूल उभारल्यास रेल्वेगाडय़ांची गतीही वाढणार आहे, शिवाय वाहने तसेच पादचाऱ्यांनाही ये-जा करणे सोपे होणार आहे. मात्र पुलाचे काम करणाऱ्या ठेकेदाराने काम अध्र्यावरच सोडल्याने हा पूल अर्धवट अवस्थेत आहे.
मध्य रेल्वेच्या उपनगरीय रेल्वे मार्गावरील प्रवासाचा वेग वाढवण्यासाठी रेल्वे रुळांवर असलेली फाटके हटवण्याची घोषणा केंद्रीय रेल्वेमंत्री सुरेश प्रभू यांनी केली होती. या फाटकांमुळे रेल्वेचा वेग कमी होण्याबरोबरच अनेक वेळा हे फाटक ओलांडताना अनेक स्थानिक नागरिकांना अपघाताचा सामनाही करावा लागत होता. मध्य रेल्वेच्या मार्गावरील कळवा, मुंब्रा आणि दिव्यादरम्यान प्रवाशांचे मोठय़ा प्रमाणात अपघात होत असून हे टाळण्यासाठी खारेगाव जवळ रेल्वे उड्डाणपुलाची गरज निर्माण झाली होती. रेल्वे प्रशासनाने तसा प्रस्ताव तयार करून महापालिकेच्या मंजुरीने या कामाला सुरुवातही झाली. मात्र या पुलाचा विकास अत्यंत कासवगतीने सुरू आहे. या परिसरामध्ये असलेल्या महापालिकेच्या मालकीच्या मैदानातून हा पूल जाणार असल्याने त्याला स्थानिकांकडून विरोध होत आहे. यामुळे या ठिकाणी ठेकेदाराने काम बंद केले होते. आता काम सुरू झाले असले तरी ते संथगती आहे.
खारेगाव नाक्यावर उभारण्यात येणाऱ्या रेल्वे पुलाच्या दोन्ही बाजूला रस्ता तयार करून नागरिकांना सोय करून देण्याची महापालिका प्रशासनाची जबाबदारी असली तरी अशा प्रकारचा रस्ता अद्याप तयार करण्यात आलेला नाही. सध्या उपलब्ध असलेल्या रस्त्याची अवस्था खेडेगावातील मातीच्या रस्त्याप्रमाणे आहे. त्यामुळे दिवसभरात या रस्त्यावरून प्रवास करताना धुळीचे लोट हवेत उडत असतात. यासंबंधी महापालिकेचे शहर अभियंता रतन अवसरमल यांच्याशी संपर्क साधण्याचा प्रयत्न केला असता तो होऊ शकला नाही.

गेल्या दोन ते तीन वर्षांपासून मध्य रेल्वेच्या मार्गावर वेगवेगळ्या ठिकाणी रेल्वे पुलांच्या निर्मितीची कामे संथगतीने सुरू आहेत. रेल्वे प्रशासन या विलंबाला पूर्णपणे जबाबदार असून हे टाळण्यासाठी रेल्वे प्रशासनाने या पुलाच्या कामांकडे लक्ष घालण्याची गरज आहे. हे पूल तयार करून नागरिकांना खुले करून देण्याची गरज आहे.
– राजेश घनघाव, प्रवक्ता उपनगरीय रेल्वे प्रवासी महासंघ