ठाणे : कल्याण रेल्वे स्थानकाजवळ बुधवारी सकाळी लोकलच्या धडकेत अंतिकादेवी दुबे (२८) हिचा मृत्यू झाला. ती रेल्वे रूळ ओलांडत असताना हा अपघात झाल्याचे रेल्वे पोलिसांकडून सांगण्यात आले. या घटनेची कल्याण रेल्वे पोलीस ठाण्यात नोंद करण्यात आली आहे.
कल्याण रेल्वे स्थानकाजवळील चांगळेवाडी परिसरात अंतिकादेवी ही राहत होती. बुधवारी सकाळी ९.४५ वाजता ती कल्याण रेल्वे स्थानकात जाण्यासाठी रेल्वे रूळ ओलांडत होती. त्या वेळेस मुंबईहून कल्याणच्या दिशेने जाणाऱ्या लोकलची तिला धडक बसली. या अपघातात गंभीर जखमी झाल्याने तिला कल्याण महापालिकेच्या रुक्मिणीबाई रुग्णालयात उपचारासाठी नेण्यात आले. तिथे उपचारापूर्वीच तिचा मृत्यू झाला. या घटनेची कल्याण रेल्वे पोलीस ठाण्यात नोंद करण्यात आली आहे.
