डोंबिवलीतील टिळकनगर शिक्षण प्रसारक मंडळाला वाणिज्य महाविद्यालयाची परवानगी

डोंबिवली- डोंबिवलीतील टिळकनगर शिक्षण प्रसारक मंडळाला वाणिज्य शाखेचे पदवी महाविद्यालय सुरू करण्याची मंजुरी मुंबई विद्यापीठाने दिली आहे. या महाविद्यालयात प्रथम वर्ष वाणिज्य प्रवेशासाठी इच्छुक विद्यार्थ्यांनी संपर्क साधण्याचे आवाहन व्यवस्थापनाने केले आहे. टिळकनगर शिक्षण प्रसारक मंडळ ही डोंबिवलीतील जुनी शिक्षण संस्था आहे. दहावीनंतर या संस्थेने कनिष्ठ महाविद्यालय, गुरुकुल शाळा, परदेशी भाषा शिकवणारे भाषावर्धिनी प्रशिक्षण केंद्र सुरू केले आहे. या सर्व शाखांचा डोंबिवली परिसरातील विद्यार्थी लाभ घेत आहेत. डोंबिवली परिसरातील विद्यार्थ्यांना शहरात सर्व शैक्षणिक सुविधा उपलब्ध व्हाव्यात यासाठी प्रयत्नशील असलेल्या टिळकनगर शिक्षण प्रसारक मंडळाच्या व्यवस्थापनाने गेल्या दोन वर्षापासून संस्थेत वाणिज्य महाविद्यालय सुरू करण्यासाठी मुंबई विद्यापीठात प्रयत्न चालविले होते. या प्रयत्नांना यश येऊन मुंबई विद्यापीठाने टिळकनगर शिक्षण संस्थेला पदवी वाणिज्य महाविद्यालय सुरू करण्यास मंजुरी दिली आहे, अशी माहिती टिळकनगर शिक्षण प्रसारक मंडळाचे कार्यवाह आशीर्वाद बोंद्रे यांनी दिली.