ठाणे महापालिकेच्या मदत कक्षाचा दूरध्वनी अखेर सुरू

ठाणे महापालिका क्षेत्रातील रस्ते आणि चौकांमध्ये गेल्या काही वर्षांपासून बेकायदा फलक उभारले जात आहेत. शहराच्या विविध भागात पोस्टर्स लावले जात आहेत. राजकीय नेत्यांना वाढदिवसांच्या शुभेच्छा देणारे फलक त्यांच्या समर्थकांकडून शहरभर लावले जातात. त्यांच्या पद निवडीचे आणि अभिनंदनाचे फलक लावले जातात. यातील बहुतांश फलकांसाठी समर्थकांकडून पालिकेची परवानगी घेण्यात येत नाही. मिळेल त्या जागी हे फलक उभारले जात असल्याने शहराचे विद्रुपीकरण होते. शहराच्या विद्रुपीकरणास कारणीभूत ठरणारे बेकायदा जाहिरात फलक, पोस्टर्स आणि कमानीविरोधात नागरिकांना तक्रार करण्यासाठी टोल फ्री हेल्पलाईनची सुविधा सुरू करण्याचे आदेश उच्च न्यायालयाने मध्यंतरी पालिकांना दिले होते. त्यानुसार ठाणे महापालिकेने १८००-२२२-१०८ हा मदत कक्ष क्रमांक सुरू केला होता.

हेही वाचा – डोंबिवलीतील गुंडगिरी मोडण्यासाठी २४ जणांना मोक्का

शहरातील बेकायदा फलकांची नागरिकांकडून माहिती मि‌ळवून त्यावर कारवाई करता यावी, या उद्देशातून हा क्रमांक सुरू करण्यात आला होता. परंतु हा क्रमांक ठाणे आपत्ती व्यवस्थापन कक्षाशी जोडण्यात आलेला आहे. परंतु हा क्रमांक बंद असल्याची बाब समोर आली होती. यामुळे नागरिकांना तक्रारी करणे शक्य होत नव्हते. या संबंधीचे वृत्त लोकसत्ताने प्रसिद्ध केले होते. यानंतर खडबडून जाग आलेल्या पालिका प्रशासनाने हा क्रमांक सुरू केला आहे. काही तांत्रिक अडचणींमुळे हा क्रमांक बंद झाला होता. याबाबत पालिका प्रशासनाने प्रभादेवी येथील एमटीएनएल विभागाकडे तक्रार करताच या विभागाने तांत्रिक अडचणी दूर करून हा क्रमांक सुरू केला, अशी माहिती सुत्रांनी दिली.