डोंंबिवली - एकत्रितपणे दारू पित असताना झालेल्या किरकोळ भांडणातून येथील तीन जणांनी फुले नगरमधील एका ४४ वर्षांच्या नागरिकाचा दोन दिवसांपूर्वी खून केला. त्याचा मृतदेह देवीचापाडा येथील खाडीत फेकून दिला होता. या प्रकरणातील तीन आरोपींना विष्णुनगर पोलिसांनी मंगळवारी अटक केली आहे. सोमनाथ शिंदे असे मृत व्यक्तीचे नाव आहे. योगेश डोंगरे (४३, मोठागाव), विलन विष्णू टावरे (४१, उमेशनगर), दीपक करकडे (मोठागाव) अशी आरोपींची नावे आहेत. देवीचापाडा खाडीत एका पुरुषाचा मृतदेह तरंगत असल्याची माहिती देवीचापाडा येथील पोलीस पाटील लक्ष्मीकांत भोईर यांनी विष्णुनगर पोलीस ठाण्याचे वरिष्ठ पोलीस निरीक्षक मोहन खांदारे यांना दिली होती. पोलिसांनी तातडीने मृतदेह ताब्यात घेऊन शवविच्छेदनासाठी पाठविला होता. हेही वाचा - कल्याणफाटा भागात आजपासून प्रायोगिक तत्त्वावर वाहतुक बदल हेही वाचा - भाईंदर : मीरा रोड येथील उद्यानात उभारलेली ‘अमर ज्योत’ नऊ महिन्यांतच विझली मृताच्या अंगावर मारहाणीच्या खुणा होत्या. पोलिसांनी तातडीने तपास करून आरोपींना डोंबिवलीतील उमेशनगर, मोठागाव भागातून अटक केली. मृत व्यक्ती, आरोपी एकमेकांचे परिचित होते. दारू पित असताना त्यांच्यात किरकोळ भांडण झाले. या भांडणातून आरोपींनी सोमनाथ शिंदे यांना ठार मारले. त्यांचा मृतदेह खाडीत फेकून दिला होता, असे पोलीस तपासात निष्पन्न झाले आहे.
