उपमहापौरांनी मारहाण केल्याची पत्नीची तक्रार

कल्याण डोंबिवली महानगरपालिकेचे उपमहापौर विक्रम तरे हे सोमवारी रात्री घरी आल्यानंतर त्यांचे पत्नी मोनालीसोबत भांडण झाले. या वेळी विक्रम यांनी आपल्याला मारहाण व शिवीगाळ केल्याचा आरोप मोनाली यांनी केला आहे. याविषयी उपमहापौर विक्रम तरे यांच्याशी संपर्क साधला त्यांनी असा कोणताही प्रकार घडला नसल्याचे ते म्हणाले. ‘‘सोमवारी महासभा झाल्यानंतर रात्री मी घरी परतलो. प्रत्येक घरात छोटेमोठे वाद हे होतच असतात. आमच्यातही काही वैचारिक मतभेद असल्याने वाद झाला. मी रात्री रागात घरातून बाहेर निघून गेलो. त्याचा माझ्या पत्नीला राग येऊन तिने पोलीस स्टेशनमध्ये जाण्याचा निर्णय घेतला असेल; परंतु मी पोलिसांना माझे म्हणणे सांगितले असून पुढील तपास ते करीत आहेत,’’ असे ते म्हणाले.

या प्रकरणी कोळसेवाडी पोलीस स्टेशनचे साहाय्यक पोलीस निरीक्षक पी.एम. येजरे म्हणाले, मोनाली तरे यांनी रात्री कोळसेवाडी पोलीस ठाण्यात येऊन पती विक्रम तरे यांच्याविरोधात मारहाण व शिवीगाळ केल्याचा अदखलपात्र गुन्हा नोंदविला आहे. त्यांना वैद्यकीय तपासणीसाठी पाठविण्यात आले होते, परंतु त्या पुन्हा पोलीस स्टेशनमध्ये आल्या नाहीत.

दरम्यान मोनाली तरे यांच्याशी संपर्क साधण्याचा प्रयत्न केला असता त्यांचा दूरध्वनी बंद होता. त्यांनी नुकताच नवीन नंबर घेतला असून तो आपल्याकडे नसल्याचे विक्रम तरे यांनी सांगितले; परंतु मोनाली व विक्रम यांच्यात गेल्या काही महिन्यांपासून वाद सुरू होते. या रागात विक्रम यांनी मोनाली यांच्याकडून त्यांचा फोन काढून घेतला असल्याची चर्चा सर्वत्र सुरू आहे.