मायक्रोसॉफ्टचे सहसंस्थापक आणि प्रसिद्ध उद्योगपती बिल गेट्स सध्या भारत दौऱ्यावर आहेत. तसेच रिलायन्स इंडस्ट्रीचे चेअरमन आणि एमडी मुकेश अंबानी यांचा धाकटा मुलगा अनंत आणि सून राधिका मर्चंट यांचा प्री-वेडिंग कार्यक्रम (फंक्शन) १ ते ३ मार्च या दरम्यान होता. कलाकार, क्रिकेटपटू; तर देश विदेशातील पाहुणे यांच्याबरोबर या कार्यक्रमात बिल गेट्स यांनीसुद्धा हजेरी लावली होती. यादरम्यान बिल गेट्स त्यांनी केवडियातील स्टॅच्यू ऑफ युनिटीलासुद्धा भेट दिली आहे.
स्टॅच्यू ऑफ युनिटी हा सरदार वल्लभभाई पटेल यांचा ५९७ फूट उंचीचा जगातील सर्वात उंच पुतळा आहे. गुजरातमधील केवडियाजवळील नर्मदा नदीच्या किनारी सरदार वल्लभभाई पटेल यांचे भव्य स्मारक उभारण्यात आले आहे. जगातला हा आत्तापर्यंतचा सर्वात भव्य पुतळा आहे. या स्मारकाचे लोकार्पण पंतप्रधान नरेंद्र मोदींच्या हस्ते करण्यात आले होते, तर बिल गेट्स यांनी २ मार्च रोजी गुजरातमधील केवडियाजवळील जगातील सर्वात उंच पुतळा स्टॅच्यू ऑफ युनिटीला भेट दिली. हा उंच पुतळा पाहून बिल गेट्स प्रभावित झाले. पाहा बिल गेट्स यांनी शेअर केलेला व्हिडीओ.
व्हिडीओ नक्की बघा :
व्हायरल व्हिडीओत तुम्ही पाहिलं असेल की, या भव्य पुतळ्यासमोर उभं राहून बिल गेट्स नेटकऱ्यांना ते कुठे उभे आहेत, याचा अंदाज लावायला सांगत आहेत. त्यानंतर कॅमेरा हळूहळू या भव्य पुतळ्याची झलक दाखवण्यास सुरुवात करतो. नंतर पुढे एक महिला स्टॅच्यू ऑफ युनिटी संग्रहालयाभोवती बिल गेट्स यांना मार्गदर्शन करताना दिसत आहे. याशिवाय स्टॅच्यू ऑफ युनिटी कॉम्प्लेक्समध्ये बांधलेल्या आरोग्य व्हॅनसह इतर ठिकाणांनाही बिल गेट्स यांनी भेट दिली आहे.
सोशल मीडियावर हा व्हिडीओ बिल गेट्स यांच्या अधिकृत @thisisbillgates या इन्स्टाग्राम अकाउंटवरून शेअर करण्यात आला आहे. तसेच “व्वा! जगातील सर्वात उंच पुतळा स्टॅच्यू ऑफ युनिटीला मी भेट दिली. या अभियांत्रिकी चमत्काराला भेट देण्याचे आमंत्रण दिल्याबद्दल पंतप्रधान नरेंद्र मोदी @narendramodi यांचे आभार मानतो आणि मला होस्ट (Host) केल्याबद्दल मुख्यमंत्री @bhupendrapbjp तुमच्या सरकारचे आभार मानतो”, अशी कॅप्शन त्यांनी या व्हिडीओला दिली आहे.
