ऑनलाईन मागवले २५ प्लेट समोसे! डॉक्टरला द्यावे लागले १ लाख ४० हजार रूपये, मुंबईत घडला धक्कादायक प्रकार

ऑनलाईन पेमेंट करताना त्यांच्या खात्यातून ही रक्कम कमी झाली. डॉक्टरने ज्या हॉटेलमधून समोसे मागवले होते, त्यांनी फक्त १५०० रुपये देण्यास सांगितलं होतं. परंतु, त्यांच्या खात्यातून १.४० लाख रूपये कट झाले. या गंभीर प्रकरणाची नोंद डॉक्टरने भोईवाडा पोलीस स्टेशनमध्ये केली आहे. पोलिसांनी या प्रकरणाचा तपास सुरु केला असल्याचं समजते.

नक्की वाचा – पॅसिफिक महासागरात सर्फिंगला गेलेल्या तरुणाला सापडला ‘हा’ दुर्मिळ मासा, सर्वांना चकीत करणारा व्हिडीओ व्हायरल

२७ वर्षीय डॉक्टर मुंबईच्या सायन येथील केईएम रुग्णालयात नोकरी करतो. भोईवाडा पोलीस स्टेशनमध्ये दाखल केलेल्या तक्रारीत त्यांनी म्हटलं की, ते शनिवारी मित्रांसोबत पिकनिकला जाणार होते. यासाठी त्यांनी गुरुकृपा हॉटेलला फोन केला आणि २५ प्लेट समोसे ऑर्डर केले. डॉक्टरला फोनवर त्यांनी १५०० रुपये देण्यास सांगितलं.

लिंक पाठवून पैसे मागितले

डॉक्टरने सांगितलं की, त्यांनी १५०० रुपयांचं पेमेंट केलं पण हॉटेलमधून त्यांना सांगण्यात आलं की, त्यांना पैसै मिळाले नाहीत. त्यानंतर डॉक्टरला पेमेंट करण्यासाठी एक लिंक पाठवण्यात आली. त्यांच्या खात्यातून २८ हजार रुपये कट झाले. हे पाहून डॉक्टरला धक्का बसला. अचानक पैसे कट कसे झाले, याचा तपास घेत असतानाच त्यांच्या खात्याशी संबंधित तीन-चार मेसेज आले आणि त्यांच्या खात्यातून पैसे कमी झाल्याचं त्यांना कळलं. डॉक्टरच्या खात्यातून १ लाख ४० हजार रूपये कट झाल्याने आर्थिक फसवणूक झाल्याची तक्रार डॉक्टरने भोईवाडा पोलीस स्टेशनमध्ये केली आहे.