एका छोट्या विषाणूने सध्या साऱ्यांना ‘लॉकडाउन’ केले आहे. भारतासह जगभरातील क्रीडा स्पर्धा स्थगित झाल्या होत्या. इंग्लंड-वेस्ट इंडिज पहिली आंतरराष्ट्रीय कसोटी खेळवण्यात आली. पण भारतीय संघ मात्र ऑगस्टच्या आधी मैदानात उतरणार नाही, हे BCCIने स्पष्ट केले आहे. त्यामुळे सर्व भारतीय क्रीडापटू आणि त्यांचा सहाय्यक कर्मचारी वर्ग आपापल्या घरी विश्राम घेत आहेत. सर्व समालोचकदेखील घरातून शक्य तितकं काम करत आहेत. याचदरम्यान प्रसिद्ध समालोचक संजय मांजरेकर यांनी एक भन्नाट फोटो पोस्ट केला आहे.

सध्या बहुतांश लोक वर्क फ्रॉम होमचा पर्याय स्वीकारत काम करत आहेत. त्यामुळे घरातील वाय-फायचा वापर प्रचंड प्रमाणात वाढला आहे. काही वेळा वाय-फायचा स्पीड कमी जास्त होण्याची प्रकरणेही दिसून येतात. वाय-फाय संबंधीची अशीच एक तक्रार भारताचे माजी क्रिकेटपटू संजय मांजरेकर यांनी केली. घरात बसून विविध लोकांच्या ऑनलाइन मुलाखती घेण्यासाठी संजय मांजरेकर यांना वाय-फाय दुरूस्ती तातडीने गरजेचं असणार. त्यामुळेच त्यांनी वाय-फाय दुरूस्तीसाठी कंपनीच्या कर्मचाऱ्याला बोलावले होते. सध्या करोना संसर्गाचा धोका असल्याने तो कर्मचारी वाय-फाय दुरूस्तीसाठी पीपीइ किट घालून आला होता. त्याचा फोटो पोस्ट करत, “वाय-फाय दुरुस्तीसाठी थेट ‘नासा’तून माणूस आला”, असे मजेशीर कॅप्शन त्यांनी फोटोला दिले.

संजय मांजरेकर यांनी हा फोटो ट्विट केला आहे. या फोटोखाली अनेकांच्या झकासपैकी कमेंट आल्या आहेत. दरम्यान, सध्या करोनाने साऱ्यांना हैराण केले आहे. सर्व क्रिकेटपटू अशा कसोटीच्या काळात चाहत्यांशी संपर्क टिकवून ठेवण्यासाठी वेगवेगळ्या पद्धती शोधून काढत आहेत. काही क्रिकेटपटू लाइव्ह व्हिडीओचा आधार घेत आहेत तर काही जुने फोटो पोस्ट करत आठवणींना उजाळा देत आहेत.