आईच्या पदरी गरीबीच्या झळा, बापाला रुग्णालयात नेण्यासाठी चिमुकल्यानं ३ किमीपर्यंत ढकलली हातगाडी, Video व्हायरल

निळ्या रंगाचा शर्ट आणि आणि जीन्स घातलेला एक लहान मुलगा वडीलांना हातगाडीवरून रुग्णालयात नेताना दिसत आहे. त्या मुलाने आणि त्याच्या आईने ३ किमीपर्यंत हातगाडी रस्त्यावरून ढकलली. एका बाजूला त्याची आई आणि दुसऱ्या बाजूला तो मुलगा हातगाडी ढकलत असल्याचं व्हिडीओत पाहायला मिळत आहे. या कुंटुंबाचा धक्कादायक व्हिडीओ एका युजरने ट्वीटरवर शेअर केला आहे. व्हिडीओ शेअर करत कॅप्शनमध्ये म्हटलंय, “कदाचित मध्य प्रदेशच्या रुग्णवाहीका गरीबांसाठी नाहीत. त्यामुळेच रुग्णाला हातगाडीवरून घेऊन जाण्याची वेळ आलीय. आजारी झालेल्या माणसाला त्याचे कुटुंबीय हातगाडीला धक्का देऊन रुग्णालयात नेताना व्हिडीओत दिसत आहेत.”

नक्की वाचा – Video : मै झुकेगा नही! नागपूरच्या मैदानात डेव्हिड वॉर्नरला चढला ‘पुष्पा’ फिव्हर, व्हिडीओ होतोय व्हायरल

इथे पाहा व्हिडीओ

सोशल मीडियावर हा व्हिडीओ व्हायरल झाल्यानंतर सिंगरौलीचे जिल्हा प्रशासन खडबडून जागे झाले. या गंभीर प्रकारणाच्या चौकशीचे आदेश प्रशासनाने दिले आहेत. ” रुग्णवाहीका नसल्याने कुटुंबीयांना रुग्णाला रुग्णालयात घेऊन जावे लागले. “जिल्हा शल्य चिकित्सक आणि आरोग्य अधिकाऱ्यांना रुग्णवाहीकेच्या समस्येबाबत चौकशी करण्यासाठी सूचना देण्यात आल्या आहेत,” अशी माहिती सिंगरौलीचे अतिरिक्त जिल्हाधिकारी डी पी बरमन यांनी दिली आहे.