जगात असे बरेच लोक आहेत जे खूप विचारपूर्वक पैसे खर्च करतात. या लोकांना अनावश्यक गोष्टींसाठी पैसे खर्च करणं बिलकुलच आवडत नाही. आपण सर्वच जण खरंतर आपल्या भविष्यासाठी, पुढील योजनांसाठी, आपल्या कुटुंबियांच्या भविष्यासाठी पैसे वाचवत असतो. वर्तमानात मौजमजेत जगताना आपल्याला भविष्याचा विसर पडणं योग्य नाही. पैशाची बचत करणं ही १००% योग्य आणि अत्यंत आवश्यक गोष्ट आहे, हे आपल्याला माहिती आहेच. पण प्रत्येक गोष्टीला एक प्रमाण असतंच नाही का? आता तुम्ही कधी असं ऐकलं किंवा पाहिलं आहे का की एखादी व्यक्ती इतके पैसे वाचवते की तिला आपले कपडे धुण्यासाठी डिटर्जंट देखील विकत घेता येत नाही किंवा ती बाथरूममध्ये टॉयलेट पेपर देखील वापरत नाही? आता ही सर्व उदाहरणं वाचून अर्थात तुम्हाला धक्का बसला असेल आणि असंही वाटलं असेल की कोणीही असं काही करूच शकत नाही. पण आज आम्ही तुम्हाला अशाच एका महिलेबाबत माहिती देणार आहोत जी इतके पैसे वाचवते की, आपल्याला लागणाऱ्या जीवनावश्यक वस्तूंसाठी सुद्धा ती पैसे खर्च करत नाही. जीवनावश्यक वस्तूंमध्येही काटकसर, पैसे वाचवण्याचा 'केट'चा मार्ग अमेरिकेच्या न्यूयॉर्कमध्ये राहणारी केट हाशिमोटो, एक सर्वसामान्य स्त्रीसारखी दिसते. पण तिच्याबद्दल विशेष किंवा विचित्र गोष्ट म्हणजे ती तिच्या दैनंदिन आयुष्यात वापरल्या जाणाऱ्या छोट्या छोट्या गोष्टी विकत घेण्यात देखील प्रचंड काटकसर करते. जीवनावश्यक वस्तू देखील खरेदी करत नाही. केटच्या मते, पैसे वाचवण्याचा हा तिचा मार्ग आहे. TLC च्या Extreme Cheapskator शो मध्ये बोलत असताना केटने स्वतःबद्दल अनेक गोष्टींचा खुलासा केला आहे. केटने सांगितलं की, गेल्या ३ वर्षांपासून ती न्यूयॉर्कमध्ये राहत आहे. जरी या शहरात राहून खूप महागडं असलं तरी तिने त्यावर अनेक मार्ग शोधले आहेत. ज्याद्वारे ती आपला खर्च नियंत्रणात ठेवते. जिथे जिथे पैसे खर्च करण्याची गरज आहे तिथे ती पैसे खर्च करणं टाळते आणि कमीत कमी गोष्टी वापरून आपला उदरनिर्वाह करते. असं करून केट एका महिन्यात फक्त $ २०० म्हणजेच १४,८०० रुपये इतकाच खर्च करते. पैसे वाचवण्याचे अजब प्रकार! केटने आपल्या मुलाखतीत सांगितलं की, ती कधीही आपल्या घरासाठी फर्निचर खरेदी करत नाही. ती नेहमी रस्त्यालगत पडलेल्या रद्दीचा वापर करून घरासाठी फर्निचर बनवते. केट म्हणाली कि, "कधीकधी लोक त्यांचं जुनं तुटलेलं फर्निचर घराच्या बाजूला फेकतात. मी ते सर्व फर्निचर माझ्या घरात वापरते. कचरा गोळा करणारे ते फर्निचर उचलण्यापूर्वीचं मी ते फर्निचर माझ्या घरी आणते. असं करून मी खूप पैसे वाचवले आहेत." इतकंच नाही तर, केटने अनेक योगा मॅट एकत्र करून तिचा पलंग बनवला आहे. डायनिंग टेबलऐवजी ती मॅगझिनच्या बंडलवर अन्न ठेवून खाते. घरातील वस्तू ठेवण्यासाठी दुसरं कोणतं खास कपाट न आणता केटने तिच्या घरात असलेल्या ओव्हनलाच शेल्फ बनवलं आहे. १९९८ मध्ये अंतर्वस्त्र खरेदी केली, त्यानंतर आतापर्यंत. केटने सांगितलं की, तिने गेल्या ८ वर्षांपासून स्वतःसाठी एकही कापड खरेदी केलेलं नाही. तिने १९९८ मध्ये स्वत: साठी अंतर्वस्त्र खरेदी केली होती. त्यानंतर आजपर्यंत तिने स्वत: साठी कोणतेही कपडे खरेदी केलेले नाहीत. तिने सांगितलेलं की, जेव्हा ती आंघोळ करते तेव्हा तिचे कपडे पाण्यात धुतले जातात. कपडे धुण्याचा स्वतंत्र साबण अर्थात डिटर्जंटचा खर्च वाचवण्यासाठी तिने ३ वर्षांपासून कपडेचं धुतलेले नाहीत. आता हे एवढं वाचून तुम्हाला धक्का बसला असेल तर तिच्याबद्दल आणखी हे गोष्ट जाणून घ्या. केट पैसे वाचवण्यासाठी टॉयलेट पेपर खरेदी करत नाही. ती स्वतःला स्वच्छ करण्यासाठी फक्त पाणी आणि साबण वापरते. तुम्हाला हे जाणून आश्चर्य वाटेल की अशा प्रकारे बचत करून केटने केवळ ६ महिन्यांत ५ हजार पौंड म्हणजेच ६ लाख रुपयांपेक्षा जास्त बचत केली आहे. आहे ना अजब?
