Vasai Panju Island: नायगाव-पाणजू फेरीबोटीला भगदाड; चालकाच्या प्रसंगावधानाने वाचले ९० प्रवाशांचे प्राण

बुधवारी नायगाव जेटीवरून पाणजू बेटावर जाण्यासाठी निघालेल्या बोटीत बाजारहाट करून परतणारे तसेच गावातील उत्तरकार्यासाठी जाणारे लोक असे सुमारे नव्वद प्रवासी चढले. पण, बोट खाडीच्या मध्यावर पोहोचताच बोटीला पडलेल्या भगदाडामुळे बोटीत पाणी भरू लागले. पाणी भरल्याने बोट वळवणे चालकाला तांडेलाला कठीण होऊन बसले. त्यामुळे बोटचालकाने बोटीचा वेग वाढवून ती किनाऱ्यावर नेण्याचा प्रयत्न सुरु केला.

किनारा गाठताना इंजिनमध्ये पाणी शिरून बोट बंद पडली. पण, चालकाच्या प्रसंगावधानामुळे इंजिन बंद पडेपर्यंत बोट किनाऱ्यावर पोहोचली होती. बोट चिखलात रुतल्यामुळे बुडण्यापासून वाचली आणि सर्व प्रवाशांचे प्राण वाचले. या घटनेनंतर बोटीची तपासणी केली असता, बोटीला दगड लागल्यामुळे सहा इंचाच्या व्यासाचे भगदाड पडल्याचे उघड झाले.

सुरक्षित प्रवासाचा मुद्दा पुन्हा चर्चेत

पाणजू बेटावरील नागरिकांना गावातून ये-जा करण्यासाठी रेल्वे पुलावरून चालत येणे, किंवा फेरीबोटीचा वापर करणे हे दोनच पर्याय उपलब्ध आहेत. या बोटीतून केवळ प्रवासीच नव्हे, तर रेशन, गॅस सिलेंडर, अवजड बांधकाम साहित्य, दुचाकीची वाहतूक केली जाते. प्रवाशांना वेळेवर पोहोचायचे असल्याने बोटीच्या क्षमतेपेक्षा कितीतरी पटीने अधिक प्रवासी जीव मुठीत धरून प्रवास करतात. त्यामुळे शासनाने तातडीने एक नवीन मोठी सुरक्षित बोट उपलब्ध करून दयावी, तसेच दैनंदिन प्रवासासाठी उड्डाणपूल बांधावा अशी मागणी नागरिकांकडून केली जात आहे.

वाहतुकीच्या सुविधांअभावी घडलेल्या दुर्घटना

दोन वर्षांपूर्वी पाणजू बेटावर घडलेल्या अशाच बोट दुर्घटनेत बुडून दोन जणांचा मृत्यू झाला होता. तर नुकताच नायगाव भाईंदर खाडीपुलावर निर्माल्याचा नारळ डोक्यात लागून तरुणाचा मृत्यू झाल्याची घटनाही यापूर्वी घडली होती.