Illegal Sand Mining in Virar: बेकायदेशीर वाळू उपाशावर कारवाई; खानिवडे बंदरात आढळली बेकायदेशीर उत्खनन केलेली ७० ब्रास वाळू

वसई विरार समुद्र किनारपट्टी व खाडी पात्रात बेकायदेशीर वाळू उपसा करण्याचे प्रकार सुरूच आहे. या वाळू उपाशाविरोधात आता महसूल विभागाने कारवाई करण्यास सुरवात केली आहे.

Illegal sand mining persists in vasai virar revenue department begins taking action

वसई विरार समुद्र किनारपट्टी व खाडी पात्रात बेकायदेशीर वाळू उपसा करण्याचे प्रकार सुरूच आहे. ( छायाचित्र लोकसत्ता टीम )

वसई : वसई विरार समुद्र किनारपट्टी व खाडी पात्रात बेकायदेशीर वाळू उपसा करण्याचे प्रकार सुरूच आहे. या वाळू उपाशाविरोधात आता महसूल विभागाने कारवाई करण्यास सुरवात केली आहे. विरार जवळील खानिवडे बंदरात वाळूच्या पाच मोठ्या कुंड्या उध्वस्त करून ७० ब्रास इतकी वाळू पुन्हा खाडीत ढकलून देण्यात आली आहे.

वसई विरार मध्ये विविध ठिकाणच्या खाडी पात्रात बेकायदेशीरपणे सक्शन पंपाच्या साहाय्याने वाळू उपसा केला जाऊ लागला आहे. विशेषतः वैतरणा खाडी,शिरगाव, जुली बेट, खानिवडे, पाचूबंदर या भागात छुप्या मार्गाने वाळू उपसा होत असतो.याचा मोठा परिणाम पर्यावरणासह बाजूच्या किनारपट्टीला बसू लागला आहे. असा वाळू उपसा रोखण्यासाठी शासन स्तरांवर विविध सामाजिक संघटनांनी अनेकदा तक्रारीसुद्धा केल्या आहेत. तर २०१४ साली नारंगी येथील शेतकरी संघटनेने उच्च न्यायालयात याचिका दाखल करून ही गंभीर बाब न्यायालयाच्या निदर्शनास आणून दिली होती. त्यानंतर त्यावर वेळोवेळी कारवाई करण्याचे आदेश ही महसूल विभागाला देण्यात आले होते. त्याच अनुषंगाने अधूनमधून महसूल विभागाकडून कारवाई केल्या जात आहे.

विरार जवळील खानिवडे चिमणे बंदर येथील भागात बेसुमार वाळू उपसा होत असल्याची गुप्त माहिती गौण खनिज विभागाला मिळाली होती. त्याच माहितीच्या आधारे पथक तयार करून खानिवडे बंदरात धाड टाकली. यावेळी बेकायदेशीर वाळू उपसा करून त्याच्या पाच मोठ्या कुंड्या तयार करून ठेवले होत्या. त्या जेसीबीच्या साहाय्याने उध्वस्त करून ती वाळू पुन्हा खाडी पात्रात टाकून देण्यात आली आहे. यात सुमारे ७० ब्रास इतकी वाळू समुद्रात टाकून दिली असल्याचे गौण खनिज पथकाचे नायब तहसीलदार चंद्रकांत पवार यांनी सांगितले आहे.

हेही वाचा

महिला ओबीसी आरक्षणामुळे माजी नगरसेवकांचे गणित बिघडले, मिरा भाईंदरमध्ये आरक्षण सोडत कार्यक्रम

किनारपट्टीचा परिसर धोक्यात

मागील काही वर्षांत खाडी, नदी आणि समुद्राच्या किनारपट्टीवर छुप्या मार्गाने सुरू असलेल्या बेसुमार वाळू उपशामुळे परिसरावर गंभीर परिणाम झाले आहेत. या उपशामुळे किनारा हळूहळू खचत असून, अनेक ठिकाणी किनारपट्टीवरील घरांचा पाया कमकुवत झाला आहे. याचा फटका नैसर्गिक पर्यावरणालाही बसला असून, विविध झाडे नष्ट झाली आहेत. तसेच, भविष्यात मासळी सुकवण्यासाठी असलेल्या जागांनाही याचा फटका बसेल अशी भीती नागरिकांनी व्यक्त केली आहे.

दहा महिन्यात सात ठिकाणी कारवाई

वाळू माफियांमार्फत विविध ठिकाणी केल्या जाणाऱ्या अवैध वाळू उपशाविरोधात जानेवारी ते ऑक्टोबर या दहा महिन्यात शिरगाव, वैतरणा पूल, उंबरपाडा, खानीवडे, कोपरी, कसराडे, तानसा नदी या सात ठिकाणी वसईच्या महसूल विभागाकडून कारवाई करण्यात आली आहे. या कारवाईदरम्यान १३ बोटी, १८ सक्शन पंप, दहा रेतीच्या कुंड्या, एक डिझेल पंप उध्वस्त करण्यात आला आहे. तर तीन जणांविरोधात गुन्हे दाखल करण्यात आले आहे.