नालासोपारा पेल्हार येथे कारखान्याला भीषण आग; चार तासाच्या अथक प्रयत्नानंतर अग्निशमन दलाकडून नियंत्रण

नालासोपारा पूर्वेच्या पेल्हार येथे वाकणपाडा परिसर आहे.या भागात मोठ्या प्रमाणात औद्योगिक कारखाने उभे राहिले आहेत. याच भागातील एकता नगर वाकणपाडा येथे झिग्मो पॉलिमर्स या कारखान्यात गुरुवारी सकाळी अचानकपणे भीषण आग लागली होती. या घटनेमुळे आजूबाजूच्या परीसरात खळबळ उडाली होती.

याची माहिती तातडीने वसई विरार महापालिकेच्या अग्निशमन दलाला मिळताच घटनास्थळी पोहचून आगीवर नियंत्रण मिळविण्याचे काम सुरू केले होते. कारखान्यात प्लास्टिक कच्चा माल (दाणे ) असल्याने आगीची तीव्रता अधिकच वाढली होती. यावेळी आचोळे, श्रीप्रस्थ, वसई फाटा अशा तिन्ही केंद्रातील अग्निबंबाच्या साहाय्याने आगीवर नियंत्रण मिळविले.

जवळपास चार तासानंतर ही आग आटोक्यात आली असल्याचे अग्निशमन दलाच्या जवानांनी सांगितले आहे. नेमकी आग कोणत्या कारणामुळे लागली त्याचे कारण समजू शकले नाही. या आगीत कोणतीही जिवीतहानी झाली नसून कारखान्याचे मोठे नुकसान झाले आहे.