मनवेलपाडा तलावात डॉ. आंबेडकरांचा पुतळा उभारणार, पालकमंत्री रवींद्र चव्हाण यांचे निर्देश

वसई : विरारच्या मनवेलपाडा तलावात डॉ बाबासाहेब आंबंडकरांचा पुतळा उभारण्यासाठी कायदेशीर प्रक्रिया पूर्ण करण्याचे निर्देश पालकमंत्री रवींद्र चव्हाण यांनी दिले. दरम्यान, कार्यकर्त्यांनी उभारलेला मनवेलपाडा नाक्यावरील डॉ आंबेडकरांचा पुतळा हटवू नये आणि आंदोलनकर्त्यांवर गुन्हे दाखल करू नये असे निर्देशही त्यांनी दिले.

विरार पूर्वेच्या मनवेलपाडा तलावात डॉ बाबासाहेब आंबेडकर यांचा पुतळा उभारण्याची मागणी २०१८ पासून पालिकेकडे करण्यात येत होती. परंतु पालिकेने आश्वासन देऊनही मागणी पूर्ण केली नाही आणि तलावाचे सुभोभिकरण केले. यामुळे विविध पक्ष आणि संघटनेतील आंबेडकरी कार्यकर्त्यांनी तलावासमोरील चौकात बाबासाहेब आंबेडकरांचा अर्धाकृती पुतळा उभारला. जो पर्यंत तलावात पुतळा उभारला जात नाही तो पर्यंत नाक्यावरील अर्धाकृती पुतळा हटवला जाणार नाही, अशी भूमिका कार्यकर्त्यांनी घेतली होती. त्यामुळे मोठा वाद निर्माण झाला होता.

आणखी वाचा-वसई: मालमत्ताकराचे सर्वेक्षण करणार्‍या एजन्सीकडून लूट, हितेंद्र ठाकूरांकडून एजन्सी काढून टाकण्याचे निर्देश

या वादात्या पार्श्वभमीवर संविधान कृती समितीने पालकमंत्री रवींद्र चव्हाण यांची भेट घेतली. कायदेशीर बाबी तपासून मनवेल पाडा तलावात डॉ बाबासाहेब आंबेडकरांचा पुतळा उभारण्यासाठी पु निर्देश त्यांनी पालिका आयुक्त अनिलकुमार पवार आणि जिल्हाधिकारी गोविंद बोडके यांना दिले. पुतळा आंदोलनकर्त्यांवर कुठलेही गुन्हे दाखल न करण्याचे निर्देशही त्यांनी पोलीस अधिकार्‍यांना दिले. तलावात पुतळा उभारला जात नाही तोपर्यंत नाक्यावरील पुतळा हटवला जाणार नसल्याची ग्वाही पालकमंत्र्यांनी दिली.

मनवेलपाडा तलावात भारतरत्न डॉ. बाबासाहेब आंबेडकर यांचा पुतळा उभारण्यात यावा या मागणीसाठी संविधान कृती समितीच्या पाठपुराव्याला यश आल्याने कार्यकर्त्यांनी आनंद व्यक्त केला आहे.