वसई विरार शहरात विविध ठिकाणी पथदिवे बंद; नागरिकांची अंधार यात्रा अपघाताचा धोका

यामुळे शाळेतून व शिकवणी वरून परतणाऱ्या विद्यार्थ्यांना तसेच कामावरून घरी परतणाऱ्या महिलांना घरी पोहोचणे कठीण झाले आहे. मुख्यत्वे रात्रीच्या सुमारास पथदिव्यांच्या अभावी परिसरात वावरणे देखील आता नागरिकांना कठीण होऊन बसले असल्याचे नागरिकांनी सांगितले आहे.पथदिवे सुरू नसल्यामुळे रोज रात्री अंधारात घरी परतावे लागते. ज्यामुळे रस्त्यावर चालायला देखील भीती वाटते. लहान मुले आणि वृद्ध व्यक्तींना रस्त्यावरून चालताना बरीच अडचण येते. तसेच अनेकजण रस्त्यावर धडपडून पडल्यामुळे त्यांना इजा देखील झाली असल्याचे नालासोपारा येथील सत्य प्रकाश यांनी सांगितले आहे.

पालिकेने शहरातील विविध ठिकाणच्या पथदिव्यांची पाहणी करून जे नादुरुस्त व बंद झाले असतील ते सुरू करावे अशी मागणी नागरिकांनी केली आहे. तांत्रिक बिघाडामुळे काही भागांतील पथदिवे बंद होत आहेत. विविध ठिकाणी पालिकेचे पथदिवे देखभाल दुरुस्ती पथकाकडून दुरुस्त केले जातील असे महापालिकेच्या विद्युत विभागाकडून सांगण्यात येत आहे.

पथदिव्यांअभावी महिलासुरक्षेचा प्रश्न ऐरणीवर पथदिवे नसल्यामुळे संध्याकाळ झाली की आम्ही घरीच बसून राहतो. मुलं खेळायला बाहेर जात नाहीत. तसेच महिलांनाही एकटं बाहेर पडणं सुरक्षित वाटत नाही. नोकरीवरून परतणाऱ्या महिलांना देखील या भागातून प्रवास करणे कठीण होऊन बसले आहे, असे मत स्थानिक नागरिकांकडून व्यक्त केले जात आहे. 

अपघाताचा धोका

मुख्य रस्त्यासह शहराअंतर्गत रस्त्यावरील विविध ठिकाणी पथदिवे बंद असतात. आता पावसाळा असल्याने जास्तच अंधार असतो अशावेळी वाहने चालविणे कठीण होते. पथदिवे बंद असल्याने काही वेळा रस्त्यावरील खड्डे दिसत नाहीत. त्यामुळे वाहनांचे चाक त्यात अडकून अपघात होण्याची भीती वाहनचालकांनी व्यक्त केली आहे.