लॉकडाउनच्या चौथ्या टप्प्यात आर्थिक कारभाराला सुरुवात

नवी दिल्ली : देशभरात लॉकडाउनच्या चौथ्या टप्प्याला सुरुवात झालेली असली तरी आर्थिक कारभार रुळावर आणण्यासाठी काही प्रमाणात उद्योग-व्यवसाय सुरु करण्यात आले आहेत. दिल्ली सरकारनं ऑटो (एक प्रावाशी), टॅक्सी आणि प्रायव्हेट कॅब (२ प्रवासी) तसेच २० प्रवाशांना घेऊन जाणाऱ्या बसना परवानगी दिली आहे. त्याचबरोबर कर्नाटक सरकारनंही सार्वजनिक वाहतूक व्यवस्था सुरु करण्यास सशर्त परवानगी दिली आहे. येथे काही जॉगिंग पार्कमध्ये पहाटे व्यायामासाठी लोकही दिसू लागले आहेत. बंगळुरुमधील लालबाग बोटॅनिकल गार्डनही आजपासून सुरु करण्यात आले आहे. त्याचबरोबर हैदराबादमध्येही ऑटो, टॅक्सी तसेच केशकर्तनाच्या सेवा सुरु करण्यात आल्या आहेत. उत्तर प्रदेशातील प्रयागराज येथे मुख्य बाजारातील दुकानं खुली झाली आहेत. देशात सध्या ३१ मे पर्यंत चौथ्या टप्प्यातील लॉकडाउन वाढवण्यात आला आहे. दरम्यान, देशात करोनाबाधितांची संख्या एक लाखाच्यावर पोहोचली आहे.