Pune: मुख्यमंत्र्यांचं भाषण अन् घोषणाबाजी!, लहुजी साळवेंच्या स्मारकाच्या भूमिपूजनावेळी काय घडलं?

पुण्यातील संगमवाडी पुलाजवळील जागेत आद्य क्रांतीगुरू लहुजी वस्ताद साळवे यांच्या स्मारकाचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या हस्ते भूमिपूजन झाले. या कार्यक्रमादरम्यान मुख्यमंत्री एकनाथ शिंदे हे भाषण करण्यास उभे राहताच, सभा मंडपातील काही नागरिकांनी साहित्यरत्न अण्णा भाऊ साठे यांना भारतरत्न पुरस्कार जाहीर झालाच पाहिजे,अशा घोषणा देण्यास सुरुवात केली. त्यावेळी पोलिस आणि उपस्थित नेतेमंडळींची चांगलीच तारांबळ उडाल्याचे पाहण्यास मिळाले. घोषणा देणार्‍या नागरिकांना पोलिसांनी शांत करण्याचा प्रयत्न केला. मात्र तरी देखील घोषणा सुरूच होत्या, घोषणा देणार्‍या नागरिकांचा पवित्रा लक्षात घेऊन मुख्यमंत्री एकनाथ शिंदे यांनी अण्णाभाऊ साठे यांचा विजय असो, असे म्हणताच घोषणा देणारे नागरिक शांत झाले.