अल्पवयीन मुलीवर बलात्कार केल्याच्या प्रकरणात दोषी ठरवून पोलीस नाईक असलेला आरोपी जमीनखान मुस्तफाखान पठाण याला न्यायालयाने ७ वर्षे कैदेची व ५ हजार रुपये दंडाची शिक्षा सुनावली.
बीड पोलीस दलात कार्यरत असलेल्या पठाण याने मागील वर्षी १६ वर्षांच्या या मुलीला खोटे बोलून बिंदुसरा येथे पोलिसांच्या विश्रामगृहावर नेऊन बलात्कार केला. मुलीच्या तक्रारीवरून शहर पोलीस ठाण्यात बलात्काराचा गुन्हा दाखल झाला. पोलिसांनी न्यायालयात आरोपपत्र दाखल केले. न्यायालयाने १२ साक्षीदार तपासल्यानंतर आरोपीला दोषी ठरवले. प्रमुख जिल्हा व सत्र न्यायाधीश विनय बोरीकर यांनी सोमवारी खटल्याचा निकाल देताना आरोपीला वरीलप्रमाणे शिक्षा सुनावली. सरकार पक्षातर्फे एन. एन. साबळे व अॅड. अजय तांदळे यांनी काम पाहिले.