चंद्रपूर जिल्ह्य़ात पोलीस सुस्त, चोर मस्त, नागरिक मात्र भयग्रस्त

घरफोडी, दरोडा, जबरी चोरी, फसवणूक, विनयभंग, हत्या व भंगार चोरीच्या प्रकरणात या जिल्ह्य़ाचा आलेख सतत वाढत आहे. गुन्हेगारीच्या वाढत्या प्रमाणामुळे लोकांचे जगणे कठीण झाले आहे. सुस्त पोलीस दल व मस्त चोर, असे चित्र निर्माण झाल्याने आता भुरटय़ा चोरांनाही पोलिसांचा धाक राहिलेला नाही. गुन्हेगारीचे प्रमाण वाढत असतांना चोरांना पकडण्यात अपयश येत असल्याने पोलीस प्रशासन नेमके काय करत आहे, असा प्रश्न सर्वसामान्यांना पडला आहे.
औद्योगिकदृष्टय़ा प्रगत व वनवैभवाने समृध्द या जिल्ह्य़ात मध्यमवर्गीय, श्रीमंत व व्यापारी वर्गाची लक्षणीय संख्या आहे. औद्योगिक जिल्हा असल्याने व्यापारी वर्तुळात कोटय़वधीची उलाढाल होते. त्यातच व्यापाऱ्यांचे आर्थिक व्यवहारही चांगले आहेत, मात्र गेल्या काही महिन्यांपासून चोरी, दरोडा, जबरी चोरीचे प्रकार वाढतच आहेत. अशातच काल सोमवारी वरोरा नाका चौकातील स्टेट बॅंकेच्या वाहनतळातून दोन अज्ञात मोटरसायकलस्वारांनी तीन लाखाची बॅंग पळविल्याने पोलीस दलाच्या कार्यक्षमतेवर प्रश्न निर्माण झाला आहे. केवळ हीच चोरी नाही, तर गेल्या महिनाभरात जबरी चोरीच्या चार ते पाच घटना घडल्या. जानेवारी महिन्यात येथील सराफा बाजारात आलेल्या एका छत्तीसगडच्या व्यापाऱ्याच्या स्कार्पिओ गाडीच्या काचा फोडून ५० लाखाची चांदी चोरटय़ांनी चोरून नेली. शहर पोलीस ठाण्यापासून सराफा बाजार हाकेच्या अंतरावर आहे. विशेष म्हणजे, याच प्रकरणात पोलिसांनी यवतमाळच्या एका तरुणाला बेदम मारहाण केली होती. या चोरांना पकडण्यात पोलिसांना अजूनही यश आलेले नाही.
गेल्या वर्षी भद्रावतीच्या प्रसिध्द जैन पाश्र्वनाथ मंदिरात चोरी झाली. मंदिरातील कॅमेरे नादुरुस्त करून चोरटय़ांनी कोटय़वधीचे दागिने लांबविले. या चोरीच्या तपासाचे पुढे काय झाले ठावूक नाही. ९ फेब्रुवारीला सराई मार्केट परिसरातील स्टेट बॅंक ऑफ हैदराबाद समोरून व्यापाऱ्याच्या गाडीच्या काचा फोडून अडीच लाख रुपये चोरटय़ांनी पळविले. त्यानंतर एका पत्रकाराच्या पत्नीची बॅग धावत्या ऑटोतून चोरटय़ांनी पळविली, तर भद्रावती व चंद्रपूरला चोरटय़ांनी अशाच पध्दतीने गाडीतून दोन लाखाची रोकड चोरून नेली. १२ फेब्रुवारीला राजुरा येथे भाजप नेत्याच्या घरी दरोडा पडला, तर भद्रावती व मूल येथेही अज्ञात चोरटय़ांनी अशाच पध्दतीने चोऱ्या केल्या. चोरीच्या घटना दिवसेंदिवस वाढत असतांना जिल्हा पोलीस दलाने त्यावर उपाययोजना करण्याऐवजी पोलीस प्रशासन सुस्त आहे. सुस्त पोलीस दलामुळे चोरांचेही चांगलेच फावले असून एक ते दोन दिवसाआड चोरीच्या घटना घडत आहेत.  गेल्या आठवडय़ात वरोरा तालुक्यातील माढळी येथे व्यापारी मुथा यांच्या घरी मध्यरात्री चोरटय़ांनी प्रवेश करून सोन्याचांदीच्या दागिन्यांसह ५० लाखाचा दरोडा टाकला. या घटनेला आज आठवला लोटला तरी दरोडेखोरांचा शोध घेण्यात पोलिसांना यश आलेले नाही. भुरटय़ा चोरांची संख्या तर सतत वाढत आहे. त्यातच आर्थिक गुन्हेगारीचे प्रमाणही चिंताजनक आहे. सर्वसामान्यांना आर्थिक आमिष दाखवायची व त्यांची फसवणूक करण्याचे अनेक प्रकार उघडकीस आले आहे. अशाही परिस्थितीत पोलीस दल सुस्त आहे. विशेष म्हणजे, गेल्या वष्रेभरात वरील पैकी एकाटी गुन्हय़ाचा शोध घेण्यात पोलीस दलाला यश आलेले नाही. चोरीच्या घटनांमुळे लोकांमध्ये भीतीचे वातावरण आहे. वर्दळीच्या ठिकाणी घर असेल तरी कुलूप लावून घराबाहेर पडणे कठीण झाले आहे, अशी सर्वसामान्यांची प्रतिक्रिया आहे.
साधी बॅंकेतून मोठी रक्कम काढायची असेल तरी चोरी होण्याच्या भीतीने अतिशय सतर्क राहावे लागते. केवळ शहरातच नाही, तर जिल्ह्य़ातच घरफोडी, जबरी चोरी, दरोडा, फसवणूक व विनयभंगाच्या गुन्हय़ांमध्ये कमालीची वाढ झालेली दिसून येत आहे.
त्यामुळे या जिल्ह्य़ातील पोलीस प्रशासन नेमके काय करत आहे, असा प्रश्न सर्वसामान्यांना पडला आहे. गुन्हय़ांचे प्रमाण सातत्याने वाढत असतांना चोरांना पकडण्यात पोलिसांना अपयश येत असल्याने पोलीस दल कमजोर झाल्याची टीकाही होत आहे.