काटोलचे फळ संशोधन केंद्र दुर्लक्षित

विदर्भाबाहेरील शेतकरीच नव्हे तर महाराष्ट्राबाहेरील शेजारच्या राज्यातील शेतकरी दरवर्षी रांगेत उभे राहून फळांचे बियाणे काटोल येथील प्रादेशिक फळ संशोधन केंद्रावरून घेऊन जातात मात्र, या केंद्राकडे शासनाचे पूर्ण दुर्लक्ष करून एकप्रकारे संत्रा उत्पादकांप्रती अनास्था दाखवत आहे.
या केंद्राची स्थापना शासनाने १९६५मध्ये केली. कृषी विद्यापीठाच्या स्थापनेनंतर, १९६८ला हे संशोधन केंद्र डॉ. पंजाबराव देशमुख कृषी विद्यापीठाकडे हस्तांतरीत करण्यात आले. या संशोधन केंद्रावरून मोसंबीमध्ये काटोल गोल्ड आणि संत्रामध्ये सिडलेस हे वाण विकसित करून प्रसारित करण्यात आले आहेत. याशिवाय, उद्यानविद्या, कीटकशास्त्र, वनस्पती रोगशास्त्र, मृद व रसायनशास्त्र, कृषिविद्या व वनस्पतीशास्त्र इत्यादी विषयांमध्ये ५० पेक्षा अधिक शेतीसाठी उपयुक्त अशा शिफारशी प्रसारित करण्यात आल्या आहेत. शेतकऱ्यांचा या संशोधन केंद्रावर विश्वास असल्याने, संत्रा व मोसंबीच्या कलमांसाठी शेतकरी रांगेत उभे राहून विक्रीपूर्व नोंदणी करतात.
संत्रावर्गीय पिकाखालील क्षेत्र दिवसेंदिवस वाढतच असून, त्याचे उत्पादनाचे तसेच विक्रीचे काही प्रश्न अजूनही सुटलेले नाहीत. अशा परिस्थितीत काळाची गरज लक्षात घेता, संत्रा उत्पादक शेतकऱ्यांना अधिक फायदा होण्याच्या दृष्टीने प्रादेशिक फळ संशोधन केंद्र, काटोलचे बळकटीकरण व प्रयोगशाळेचे अत्याधुनिक उपकरणासह आधुनिकीकरण होणे अतिशय आवश्यक आहे. प्रादेशिक फळ संशोधन केंद्राच्या बळकटीकरणासाठी, प्रयोगशाळेच्या अत्याधुनिक उपकरणासाठी व शेतकरी प्रशिक्षण केंद्रासाठी १४.०४ कोटीचा प्रस्ताव विद्यापीठामार्फत राज्य शासनास राष्ट्रीय कृषी विकास योजनेतून निधी मिळण्यासाठी सादर करण्यात आला होता. सदर प्रस्ताव राज्य शासनाने तत्वत: स्वीकारलाही होता. कृषी, पशुसंवर्धन, दुग्धव्यवसाय विकास व मत्स्यव्यवसाय विभागाने संबंधित प्रस्तावाला प्रशासकीय मंजुरी २०१०मध्ये प्रदान केली होती. मात्र, अद्यापही निधी उपलब्ध करून दिलेला नाही. याबाबत संत्रा उत्पादक शेतकरी, तसेच या भागातील सर्व राजकीय व सामाजिक कार्यकत्रे यांनी शासनाच्या  ही बाब लक्षात आणून दिलेली आहे. तरीही १४.०४ कोटींचा निधी केंद्राला उपलब्ध करण्यात आला नाही.  
नागपूर येथील विधिमंडळात याबाबत राज्य शासनाचे लक्ष वेधून १४.०४ कोटीचा निधी अकोल्याच्या डॉ. पंजाबराव देशमुख कृषी विद्यापीठ अंतर्गत असलेल्या प्रादेशिक फळ संशोधन केंद्र, काटोल जि. नागपूर या संशोधन केंद्राच्या बळकटीकरणासाठी, प्रयोगशाळेच्या आधुनिकीकरणासाठी, शेतकरी प्रशिक्षण केंद्र व वसतिगृहासाठी उपलब्ध होईल या दृष्टीने विदर्भातील आमदारांनी प्रयत्न करावे, अशी अपेक्षा काटोल, कळमेश्वर, नरखेड, सावनेर, मोर्शी, वरुड, अमरावती, चांदूरबाजार, तिवसा, चांदूर रेल्वे, कारंजा (घाडगे), पुलगाव व आर्वी भागातील संत्रा उत्पादक शेतकऱ्यांना आहे.